Müteveffây-ı mûmâ ileyh Şâtır Yûsuf Ağa nâm kimesnenin ferzend-i ercümendi olup, güldeste-i vücûdu bâğzâr-ı ʿâlemde bûyâ ve nihâl-i istiʿdâdı âbyârî-yi feyz-i Hudâ ile reşha-gîr-i neşv ü nümâ oldukda, Mektûbî Kalemi'ne müdâvemet ve Baş-halîfelik ile kesb-i taʿayyün ü şöhret eyleyüp, giderek Sadrıaʿzam Mektûbculuğu ile be-kâm ve bir müddet mürûrunda Riyâset-i küttâb ile vâsıl-ı ser-menzil-i merâm olup, ba'de'l-'azl tekrâr Re'îs ve fülk-i devlete bercîs ve bi-tarîki'n-nakl Sadrıaʿzam'a Kethudâ ve bundan sonra Defterdârlık ile âzmâyiş-i fenn-i istîfâ ve andan Defter Emâneti'ne tahvîl ve çok geçmeden yine Kethudâlık ile tebcîl ve bilâhıre enfâs-ı hayâtını tekmîl eyledi. Mûmâ ileyh edîb ve vakūr ve etvâr-ı cemîle ile meşhûr, zihn-i nakkâd ve tabʿ-ı vekkād ile ekser ‘ulûma ıttılâʿı ve fî külli gadâtin ve 'aşiyy füzûnî-yi fazl ü kemâle sâʿî olduğundan başka, mûşikâf-ı gavâmiz-i umûr ve medâr-ı inhilâl-i mu‘dilât-ı cumhûr idi. Ancak bâ-vücûd-i kudret tabʿında husset ve zâtında denâ’et olup, bir şahsa medd-i bâʿ-ı kerem ü sehâ ve bir derd-mendin derdine hubb-i dînâr ile [M1 301] ile devâ etdiği mesmûʿ olmamışdır. Defterdâr-ı sâbık Seyyid Mehmed ‘Avnî Efendi dahi bu hilâlde terk-i ‘âlem-i zindegânî ve 'azm-i semt-i câvidânî eyledi. Mûmâ ileyh dahi mahall-i feyz olan Mektûbî Kalemi'nden neş'et ve Bâş-halîfelik'den Beylikçiliğe nakl ile kat‘-ı menzilet ve giderek Tezkire-i Sânî ve Re'îsülküttâb ve Defterdâr Emîni ve Defterdâr olmuşidi. Maʿârif ve kemâlâtdan hissedâr olduğu âsârından be-dîdârdır.