Malta Cezîresi'nden üç sefîne donanup, sevâhil-i Bahr-ı sefîd'in baʿzı mahallerine îsâl-i zarar ve tüccâr ve züvvâr sefînelerine ilkāy-ı şer edecekleri haberi, Kapudân-ı deryâ Vezîr Mehmed Paşa'nın sâmiʿasına güzer eyledikde, muhâfazaya taʿyîn olunan kalyonların Kapudanlarına ve bâ-husûs Caʿfer Bey'e mü'ekked haberler ibʿâs ve mesfûrların ahz ü istîsallerine isrâʿ u ihsâs olunup, Caʿfer Bey, kazıyyeye vâkıf olduğu sâʿat, feth-i bâd-bân-ı teveccüh ü ʿazîmet ve Kıbrıs sularına varup Kerpe sularına doğru mürûr eyledikleri ihbâr olunduğuna binâ'en, o taraflara şitâb ve rebîʿulevvelin yirmi sekizinci günü korsanların iki kıtʿa fırkatesi, manzûr-i guzât-ı zafer-nisâb olup, iki fırkatenin biri rûzgâr üstünde bulunmağla, yelken-kürek firâr ve diğeri kaçamayup bi'z-zarûre ceng ihtiyâr etmişidi. Yek hamlede tîz-dendân-ı gürâzân-ı küffâr, mağlûb-i tîg-i gâziyân-ı zafer-girdâr ve hîn-i maʿrekede dâr-ı cehennemi karâr edenlerden mâʿadâ, kavâlyer taʿbîr olunan ser-gerdeleriyle yirmi dokuz neferi bend-i kemend-i üsâr oldu. Kurûn fırkatesi Kapudanı İbrâhîm Bey dahi bu maslahata me'mûr ve bir kıtʿa korsân işkānpoyesinin baʿzı kayıklara hücûmununu istimâʿ ile münselibü'ş-şuʿûr olup, hemân fırkatesine küşâd ve Manya açıklarında zikr olunan korsânı görüp üzerine hecme-endâz-ı tırâd olup, düşmen bu hâli müşâhede ile necâtdan nevmîd ve hevl-i cân ile muktehim-i harb-i şedîd olup, bir iki sâʿat muhârebeden sonra müdâfaʿadan ʿâciz u dermân-de ve sefînelerini başdan kara eyleyerek sahrâya perâkende [M1 299] oldular. Sefîneleri mazbût ve bakıyyetü's-süyûfu hibâl-i mezellete merbût kılındığı haberi müteʿâkiben, Der-i devlet medâra vürûd eylediğinden başka, Meskov (مسقو) nâm bir korsân işkampoyasıyla Lazkiyetü'l-Arab sularında ricâl ü nisvândan yirmi dört nefer ehl-i İslâm'a tesadüf birle esîr ve şehtiyelerin zabt ve Malta'ya tesyîr üzere iken, hatabla pür-bâr Giridli el-Hâc Hüseyin nâm kimesnenin Mısır'a ʿazîmet eder sefinesine dûçâr olup, meyânede ceng ü ʿaşûb vukūʿuyle zikr olunan korsân mağlûb olup, şehtiye ile esîrleri terk ü firâr ve sefîne re’isi dahi zikr olunan şehtiyeyi ve üserây-ı İslâmiyye'yi ve Malta'ya îsâl içün üzerlerine taʿyîn olunan yedi nefer kefereyi İskenderiyye Limanı'na götürüp, Mısır Vâlîsi dahi keyfe mâ-ittefak İskenderiye'de bulunmağla, sefîne re’isi kazıyyeyi müşârun ileyhe ihbâr ve sadâkat izhâr etdiğine binâʾen hilʿat ve bahşîş ile minnetdâr kılındığından gayri, cizyeden muʿafiyetleri husûsu müşârun ileyh tarafından ihtâr olunup, tıbk-ı tahrîri üzere hakkında müsâʿade derkâr oldu.