Karaman Eyâleti, Akşehir ve Akseray ve Beyşehri sancakları ilhâkıyla, sâbıkā Sivas Vâlîsi Vezîr Feyzullah Paşa'ya ve Sivas Eyâleti, selefi Vezîr ʿAbdî Paşa'ya ve Eğriboz Sancağı, sâbıkā Selânik Mutasarrıfı Vezîr es-Seyyid Ahmed Paşa'ya tevcîh olunup, Selânik Sancağı, mukaddemâ Derbendler Başbûğluğu ile haydûd eşkiyâsının ahz ü istîsâllerine me'mûr olup, hıdemâtı şâyeste-i tahsîn ve hüsn-i mükâfâta mazhariyyeti cevlân-ger-i zamîr-i Pâdişâh-ı İskender-i temkîn olan Sarı Mehmed Paşa-zâde Ali Bey'e rütbe-i Mîr-i mîrânî ile tevcîh ü ihsân ve kemâ-kân derbendler muhafazasına sarf-ı tâb ü tuvân eylemesi bâbında tarafına hıtâben ısdâr-ı emr-i celîlü'ş-şân kılındı.