ʿAyn-ı ʿArafât ve sâyir ʿuyûnun mecrâları tekādüm-i zemân ile vîrân ve kıllet-i mâdan hâlleri perîşân olduğunu, ehâlî-yi Mekke bi'l-ittifâk ʿarz-ı südde-i Cevzâ-nitâk etmişleridi. Yedi sekiz [M1 298] sâʿat mesâfede vâkiʿ ʿAyn-ı Huneyn, ʿArafât'a ilhâk ile miyâh-ı sâyirenin mecârîsi tathîr ve tecdîd ü taʿmîr olunmak husûsuna irâde-i Şehriyâr-ı kişver-gîr taʿalluk edüp, Feyzullah Efendi Emîn-i Binâ taʿyîn ve Cidde Vâlîsi ve Mekke-i mükerreme Şerîfi tarafına emr-i ʿâlî irsâl olunup, ber-vech-i tahmîn taleb olunan altmış sekiz bin guruşun bir mikdârı nakd ve bir mikdârı Mısır cizyesinden havâle ile maslahat-ı mezkûre teshîl ü tehvîn olunmuşidi. Üç sene zarfında bu maslahat-ı hayriyye himmet-i Şâhâne ile husûl ve mâ’-i Huneyn sâyir miyâha imtizâc ü imtişâc ile Mekke-i mükerreme'ye vüsûl bulup mücâvirîn ve huccâc ser-şâr-ı zülâl-i inbisât u ibtihâc olup, mevârid ve meşâriʿ-i umûr-i devlet vâreste-i hass ü hâşâk-i küdûret olmak deʿavâtıyla cümlesi ter-zebân-ı muvâzabet oldular.