Sâbıkā İstanbul Kadısı Neylî-zâde Mehmed Hamîd Efendi, rebîʿulevvelin dördüncü günü terk-i dağdağa-i dünyâ ve ʿazm-i semt-i ʿukbâ eyledi. Mûmâ ileyh fenn-i târîhe âşinâ ve leyl ü nehâr tahsîl-i kemâlât ile şöhret-nümâ, rûhu hafîf, zâtı latîf bir kimse idi. Mâh-ı mezkûrun on ikinci günü resm-i maʿrûf ve tavr-ı meʾlûf üzere Sultân Ahmed Câmiʿinde mevlid-i şerîf kırâʾet olunup, mevcûd olan zevât o meclis-i hatîrden istifâza-i meyâmin ü berekât eylediler. Şehriyâr-i vâlâ-menkabet Kara-ağaç Sâhil-serâyı'ndan istifây-ı hazz u rağbet buyurduklarından, ecved-i mevâkiʿ ve mültekāy-ı bahreynde vâkiʿ serây-ı cedîd-i nüzhet-efzâlarına mâh-ı mezkûrda nakl ü hareket buyurdular. Rûmeli Kadıʿaskerliği ile defʿ-i hâhiş ve arzû-mendî eden İvaz Paşa-zâde İbrâhim Beyefendi, bir sene terk-i hâb ü sîne ve ibrâz-ı meʾâsir-i müstahsine edüp, bu esnâda münʿazil ve Rûmeli Pâyesi'yle Anadolu'dan munfasıl Feyzullah Nâfiz Efendi, o mesned-i bülend-i pâye ile tahsîl-i behre vü vâye eyledi. Yeniçeri Ağası olan Hüseyin Ağa, mizâc-ı Devlet'e evfak hidmete muvaffak olamayup, ʿazl ve Tekfürdâğı'na tagrîb ve Kul Kethudâsı ʿOsman Ağa mansıbıyla tatrîb olundu. Revâtib-i Devlet ile her bâr kesb-i refâhiyyet eden dergâh-ı âlî mülâzimlarının bir kıst ʿulûfeleri iʿtâ vü inʿâm ve Sadr-ı vâlâ-makām maslahat-ı devri itmâm eyledikde, teşrîfât-ı seniyye-i Şehinşâhî ile ser-kerem-i câm-ı ʿizz ü ihtişâm oldu. Beşiktaş Sâhil-serâyı'nın hareket-i arz sebebi ile baʿzı mahallerine vehn ü indirâs târî olduğu maʿlûm-i Tâcdârî olup, Defterdâr-ı vakt olan Sârim İbrâhim Efendi'ye bu hidmet ihâle, ol dahi cûy-bâr-ı nakd ü vaktini isâle ile âsâr u vehn ü tezelzülü izâle eylediğinden gayri, Sultân Mehmed Hân; “eskenhüllâhü fî buhbûhati'l-cinân” hazretlerine mensûb ve vazʿ ve resmî ʿinde'n-nâs gāyet matbûʿ ve mergūb olan kasr-ı dil-ârânın dahi taʿmîr ü termîmi temâm ve şâyeste-i tahsîn-i hâss u ʿâmm oldu.