Zilhiccenin beşinci günü Donanma-yı hümâyûn'un Bahr-i sefîd'e ihrâcı tasmîm ve Şehriyâr-ı heft-iklîm ber-muʿtâd-ı kadîm Yalı Köşkü'nü kudûm-i meyâmin-lüzûmlarıyla reşk-endâz-ı kasr-ı naʿîm buyurduklarında, kûh-endâm keştîler top şenliği ile güzer eyleyerek Dolma-bağçe açığında istikrâr ve birkaç gün zarfında Kapudan Paşa, tekmîl-i noksâna ibtidâr edüp, muvâfık-ı rüzgâr ile şukka-güşâ-yı bahr-i zehhâr oldu. Şehr-i mezkûrun onuncu gicesi vüzerây-ı ʿizâm ve ʿulemây-ı aʿlâm ve sâyir huzûrları muʿtâd olan bendegân-ı ʿatebe-i gerdûn-ihtişâm Serây-ı hümâyûn'da ihtişâd ve ʿale's-seher dâmen-bûs-i Şehriyâr-ı vâlâ-nijâd ile ihrâz-ı dest-mâye-i murâd-ı mâ-fî'l-fu'âd eylediler. ʿAn asl Hısnımansûr sâkinlerinden olup, gazâret-i ʿilm sebebi ile nâyil-i ru'ûs olan es-Seyyid Mehmed Efendi, Şehr-i mezkûrda tekmîl-i nüsha-i hayât ve ʿazm-i cennât-i ʿâliyât eyledi. Mûmâ ileyh kesret-i ihâta vü maʿlûmât ile şöhret-nümâ ve dekāyik ve nükât-i menkūlât ü maʿkūlâta âşinâ bir fâzıl-ı yektâ idi. Burusa Kazâsı'ndan munfasıl Konevî Mustafa Efendi erzel-i ʿömre vâsıl ve bu cihetle şâyân-ı lütf-i Pâdişâh-ı memdûhu'ş-şemâyil olmağla, târîh-i mezkûrda Mekke-i mükerreme Pâyesi'yle matlabına nâyil oldu.