Muʿzamât-ı umûr-ı devletde istihdâm ve refte refte tahsîl-i nîk-nâm eden Monlacık-zâde ʿAlî Ağa, ber-muktezây-ı baht-ı nâ-sâzkâr gâh ü bî-gâh masrûʿ-ı ser-pençe-i rûzgâr olup, bu defʿa dahi şems-i ikbâli ʿukde-i vebâle giriftâr ve iki tûğ ile İnebahtı mansıbı kaydına dûçâr oldu. Şıkk-ı Evvel Defterdârı olan ʿAvnî Efendi, mâl-i mîrî tahsîlinde izhâr-ı butûʿ u rehâvet eylediği hasebiyle merârât-ı ʿazli zâyik ve Tersâne Emîni olan Sârım İbrâhîm Efendi fenn-i istîfâya vâkıf ve semt-i tahsîlâta ʿârif olduğundan, mansıb-ı mezkûr mûmâ ileyhe muvâfık ve gayr-ı muhâlif görülmekle, saferu'l-hayr evâsıtında hilʿat-ı istîfâ dûş-ı liyâkatine iksâ olundu. Baş-muhasebeci olan Ahmed Efendi, Emîn-i Tersâne-i ʿâmire ve Hâşim ʿAlî Bey, Baş-muhâsebe ile mükteseb-i meserret-i vâfire oldu. Defterdâr-ı sâbıkın Mühürdârı ve Târîhci bulunan ʿAlî Efendi ve yamağı ʿAlî Şâh nâm kimse ahz-ı bertîl ü rîşâ ile şöhret-nümâ olduklarından ikisi de Limni Cezîresi'ne iclâ olundular.