Zilhiccenin on üçüncü hamîs günü tulûʿ-ı âfitâbdan yarım sâʿat murûrunda iki dakīkadan ekal İstanbul ve civârında zelzele-i ʿazîme vukūʿ bulup, şiddet-i rehz ve hareket-i arz sebebi ile kârgîr binâların ve ahşâbdan masnûʿ büyût ve dekâkîn ve sâyir mahallerin ekserîsi rahne-yâb ve baʿzısı bi'l-külliyye vîrân ü harâb olup, vâfir âdem dahi tahte't-turâb rehrev-i yevmü'l-hisâb olmağla, kulûb-i nâsa dehşet ve herkese hayret ve vahşet târî ve iltizâm-ı nefs ile sagīr u kebîr dest-ber-efrâşte-i dergâh-ı Kird-gârî oldular. Bu musîbet-i ʿuzmâdan birkaç gün mürûrunda salât-ı cumʿa edâ olunur iken, kemâ fi'l-evvel hareket-i arz vâkiʿ olup, evvelki zelzeleden ehaf ise dahi kalb-i nâs merʿûb ve râhat-ı halk meslûb olup, şehr-i rebîʿulevvele dek bu hâl müstemir ve aralık aralık hareket-i zemîn müstekar olduğundan ekser-i nâs kazây-ı vâsiʿ ve küşâde mahallerde nasb-ı hıyâm ile ârâm ve ebniye semtine varmamağı iltizâm etmişler iken, cenâb-ı Perverdigâr zaʿîfü'l-eyâd olan ʿibâdına rahm ü şefekat ve o kadar tenbîh ile elâne-i ʿarîke-i ehl-i maʿsiyyet etdikden sonra, o belây-ı âsumânî ve kazây-ı nâgehânîyi izâle vü izâha ve hirâs ü bîm ile kalbi dü-nîm olanları irâha eyledi. Şehriyâr-ı merhametkâr meşâyih ve fukarâ ve dervişân ve zuʿafâyı ʿatâyây-ı Şâhâne ve menâyih-i Pâdişâhâne ile nâyil-i dînâr-ı bî-şümâr ve vâreste-i muzâyaka vü iftikār eyleyüp, inâbet ü istiğfâra halkı tahrîz içün vâʿizlere tenbîh ve defʿ-i belâ ve redd-i kazâ içün leyl ü nehâr duʿâya meşgûl olmalarını tavsiye ile hâllerini terfîh eyledi. Zelzeleden harâb olan emâkini binâ içün himmet-i Şâhâne rû-nümâ olup, cennet-mekân-ı huld-âşiyân Sultân Mehmed Câmiʿi'nin mâl-ı vakfında vefâ edecek kadar fazla nükūd bulunamayup, Hazîne-i hümâyûn'dan imdâd ü iʿâne ile Hâşim ʿAli Bey'i, Binâ Emâneti'ne meʾmûr buyurduklarından gayri, çarşuya Tıflî Efendi'yi ve kalʿa [M1 276] dîvârlarına el-Hâc Mehmed Ağa'yı ve Baruthâne'ye, Şehdî ʿOsmân Efendi'yi ve Serrâchâne'ye ʿAtıf-zâde ʿÖmer Efendi'yi ve Enderûn-i hümâyûn'a, Şehr-emîni Ahmed Efendi'yi ve Yeniçeri odalarına, Hasekî Mustafa Ağa'yı ve Tophâne'ye, Mahmûd Bey'i taʿyîn buyurup, herkes hidmetlerini edâ ve tehvîn içün berzede-i dâmân ü âstîn oldular. Sultân Selîm ve Şehzâde ve Süleymâniyye ve Nûr-i ʿOsmânî ve Lâleli ve Vâlide ve Ayasofya cevâmiʿinden maʿadâ câmiʿlerin baʿzan minâreleri ve baʿzan kubbeleri münhedim ü müzmahil ve kalʿa dîvârları ve Çekmeçeler ve Bergos ve Çorlu ve Karışdıran dahi mütezelzil olup, zikr olunan mahallerin cümlesi binâ ve taʿmîri fermân ve taʿyîn-i mübâşirân kılındı.