Girne Dizdârı Halîl, bundan akdem esâre-i gubâr-ı fitne vü gavgā ile Kıbrıs ehâlîsini Muhassıl bulunan Çil ʿOsmân'ın katline igrâ etmişidi. Taʿyîn-i asker ve tertîb-i leşker ile nizâm-ı beldeye mübâşeret fukarâ vü zuʿafâyı pâ-zede-i hasâret eyleyeceği zâhir olduğundan, hüsn-i tedbîr ve nush-ı serîʿu't-te'sîr ile nizâmına teşebbüs olunup, Muhassıllık, Süleymân Ağa'ya tevcîh ve bâlâda mezkûr meʾmûrlara ıslâh-ı zâtü'l-beyn ve defʿ-i vahşet-i tarafeyn husûsu tenbîh olunmuşidi. Meʾmûrlar cihet-i intifâʿa mâyil olduklarından, fesâd-ı memleket zâyil olmayup, şakī-yi merkūmun dahi gün-be-gün cemʿiyyetine kesret ve rekîz-i zamîri olan mevâdd-ı fesâda kuvvet gelüp, bir iki bin âdem ile Muhassıl'ı tazyîk ve Lefkoşa'ya nazarını taʿlîk ile âgāz-ı muhâsara ve âheng-i müşâcere eylediği Der-i devlet'e işʿâr ve istinsâr olunmuşidi. [M1 277] Teke Sancağı Mutasarrıfı Hâs Ağası Mîr-i mîrân Ahmed Paşa'ya irsâl-i menşûr ve Kıbrıs nizâmına me'mûr kılındığından başka, Caʿfer Bey'in iki kıtʿa sefînesiyle iki kıtʿa mîrî firkatesi asker ve levâzım teşhîni ile o tarafa taʿyîn olunup, imdâd-ı rûzgâr ile Caʿfer Bey fî esraʿi'z-zemân Girîne sularına dehşet-resân oldukda, dizdârın kalʿa muhâfazasına taʿyîn eylediği şirzime-i kalîle, sedd-i ebvâb ve emr-i muhâfazada terk-i râhat ü hâb ve Caʿfer Bey ise top dâneleriyle kalʿayı müşrif-i harâb edüp, bu hâlde iken Ahmed Paşa dahi vâfir asker ile cezîreye ayak basdığını dizdâr-ı mezkûr tahkīk edüp, Lefkoşe muhâsarasından ferâgat ve mukābele niyyetiyle Değirmenlik nâm mahalde mutarassıd-ı fursat olup, paşa-yı mûmâ ileyh zâtında merkûz cevher-i besâlet ve mâye-i şecâʿat iktizâsıyla şakī-yi merkūmun üzerine râyet-keş-i celâdet olup, ictimâʿ-ı ferîkayn ve telâkī-yi hasmeyn vukūʿunda merkūm tâb-âver-i mukāvemet olamayup, başında olan haşerât-ı nâs perîşân ve birkaç yüz âdem ile kalʿaya girüp, tehassun ve çâre-cûy-i emn ü emân olmuşidi. Paşa-yı mûmâ ileyh kalʿanın cevânib-i erbiʿasını istîʿâb ve Caʿfer Bey dahi levendâtıyla sâhile çıkup, her tarafdan esbâb-ı muhâsara şakī-yi merkūmu pâ-beste-i havf ü ıztırâb edüp, ʿâkıbet ʿavenesinden otuz nefer kimse kalʿadan bir-takrîb yol bulup, or- duya dahîl ve şakī-yi merkūm dahi irtikâb etdiği kâr-ı nâ-hencârdan nâdim ü hacîl olup, bi'z-zarûre müteşebbis-i dâmân-ı istîmân olarak orduya geldikde, seng-i gadriyle dil-şikeste olan askerî tâyifesi hücûm ve rüfekāsıyla kendüsünü dâyire-i hestîden maʿdûm edüp, ru'ûs-i maktûʿaları Âsitâne'ye vâsıl ve fazl-ı Hak ile cezîrede tekevvün eden şûriş ü ihtilâl bi'l-külliyye zâyil olup, ehâlîyi dahi nezr-i girâne katʿ ve derûnlarında olan havf ü veceli defʿ edüp, Paşa-yı mûmâ ileyhin hidmeti meşkûr ve saʿyi mebrûr olduğundan, rütbe-i vâlây-ı Vezâret ile eltâf-ı Şâhâne'ye mazhar ve Karaman Eyâleti'yle nâyil-i sürûr-i evfer oldu. Sâbıkā Karaman Vâlîsi Vezîr Kethudâ Mehmed Paşa bilâ-mansıb kaldığundan, Kars Muhâfazası'na taʿyîn ve fitne-i Gürcistân sebebi ile o havâlî müşârun ileyhin bu me'mûriyyeti ile tahsîn olundu.