ʿÎd-i fıtr gicesi erkân-ı Devlet-i ebed-kıyâm Serây-ı hümâyûn'a ʿatf-ı zimâm ve dâmen-bûs-i Pâdişâh-ı Dârâ-gulâm ile ihrâz-ı rütbe-i merâm eylediler. İstanbul Pâyesi olup, ʿAli Paşa ahfâdından ʿOsmân Beyefendi, baʿzı ʿilel ile bî-tâb ü tüvân ve târîh-i mezkûrda hırâmân-ı ravza-i cinân oldu. Şöhreti âfâk-gîr olan Tâhir Ağa, Âsitâne-i saʿâdet'den Gümüşhâne Emâneti ile istiskāl ve Mehmed Emîn Ağa etbâʿından Hasan Ağa, Ergani ve Kebân Maʿdenleri Emâneti ile münşerihu'l-bâl [M1 274] kılındı. Muhassıl-ı maktûlün ahvâline ıttılâʿ içün mukaddemâ Kıbrıs'a kapucu-başılardan Topçu-başı-yı sâbık mübâşir ve Yemliha Efendi, müvellâ nasb olunmuşidi. Mûmâ ileyhimâdan celb-i menfaʿate dâ'yir hareket, vâhid-i tarafeyni li-garazın iltizâma müteʿallık tavra cesâret eyledikleri hufyeten inhâ olunup, Kapucu-başı Limni'ye ve Yemliha Efendi, Edirne'ye iclâ olundu. Bir iki mâh mukaddem Beylikçilik'den maʿzûl ve hânesinde kûşe-güzîn-i vahdet ü humûl olan Kudsî Efendi, evâyil-i zilhiccede hükm-i Cihân-mutâʿ-ı Sübhânî'ye mümtesil ve dâr-ı âhirete müntakıl oldu. Mûmâ ileyh Kıbleli-zâde dâ'iresinde neşv ü nemâ kesb edüp, kadr-i müşterek hüner ü kemâli ve sâye-i devletde vâfir ʿakār ü emvâli var idi. Âsitâne'de bast-ı kālîçe-i ârâm ü istirahat eden Kāyim-makām Vezîr Mehmed Paşa'ya, Rumeli Eyâleti ʿinâyet olunup, Âsitâne'den hareket ve o tarafa tevcîh-i veche-i ʿazîmet ve Köprülü-zâde Vezîr Ahmed Paşa'ya dahi Bosna Eyâleti verilüp, mansıbına bir ân akdem lüzûm-i lühûku tarafına işâret olundu. Evâyil-i şevvâlde tevcîhât vukūʿ bulup, hademe-i bâb ibkā olunup, fekat Çavuşbaşılık, Yenişehirli ʿOsmân Efendi'ye ve Beğlikçilik, Kudsî Efendi mahlûlünden Âmedci Râfet Mustafa Efendi'ye tevcîh olundu. Defterdârân ibkā olunup, Defter Emâneti, Râkım Efendi'ye; Büyük Rûznâme, Sadrıaʿzam birâderi Ahmed Bey'e; Darb-hâne Emâneti, Râyif İsmâʿîl Bey ʿazlinden Yazıcı-yı esbak ʿİzzet Mehmed Bey'e; Matbah Emâneti, ʿAbdullatîf Bey'e; Arpa Emâneti, Sadrıaʿzam etbâʿından İbrâhîm Ağa'ya; Anadolu, Elmas Paşa-zâde'ye; Mukābele-i Süvârî, Ebûbekir Bey'e; Haremeyn, Yûsuf Efendi dâmâdı Ahmed Efendi'ye; Cizye, Nûrî Bey'e; Mâliyye, Münîb Efendiye; tevcîh olunup, sâ'ir menâsıb dahi erbâbına tevcîh ve ibkā ve baʿzılar dahi ʿatâyâ ile irzâ olundular. Büyük Mîrahûrluk, Selîm Ağa'ya; Sipâh Ağalığı, Süleymân Ağa'ya; Silahdâr Ağalığı, ʿAli Bey'e tevcîh ve kusûr-i menâsıb dahi mutasarrıflarına ibkā olundu. Donanma-yı hümâyûn'un kâffe-i levâzımı pezîrefte-i hüsn-i temşiyet olduğuna binâ'en, mâh-ı zilhiccede Kapudan Paşa, mersây-ı Tersâne'den hareket ve alay irâ'eti ile huzûr-i hümâyûnda telebbüs-i hilʿat ve Ak-deniz'e doğru feth-i râyet-i ʿazîmet eyledi. Mısr-ı Kāhire'den be-her sene vürûd ede gelen hazînenin Üsküdar'a geldiği ihbâr ve fi'l-hâl çekdiri taʿyîn ve Âsitâne'ye imrâr olunup, Hazîne-i hümâyûn'a teslîm ü edâ ve üzerine taʿyîn olunan mîr ve sâyir kimselere hilʿatler iksâ olundu. ʿÎd-i adhâ [M1 275] gicesi vücûdu muʿtâd olan ashâb-ı câh Serây-ı hümâyûn'da ictimâʿ ile muntazır-ı talʿat-ı Pâdişâh-ı ʿâlem-penâh olmuşlar idi. Beyâz-ı sabah be-dîdâr oldukda, Hâkān-ı İskender-tüvân [mısra]: Gün gibi oldu ʿayân müjde o Cemşîd-i zemân mefhûmu nümâyân ve etrâf ü eknâfa tahrîk-i ebruvân-ı birr ü ihsân buyurup, ʿaleyke ʿavnullâh sadâsı vâsıl-ı ʿinân-ı âsumân ve ferîde-i: Çeşm-i bed ez-rûy-i tû bâdâ baʿîd Sabbehakallâhü sabâhe's-saʿîd nâtıka-güzâr-ı ehl-i dîvân olup, zeyl ve dâmen-i hümâyûnları takbîl ve resm-i tehniyyet tekmîl olundu.