Cidde Vâlîsi olan Vezîr Sâlih Paşa bundan akdem Medîne-i münevvere muhâfazasına taʿyîn ve ehâlî-yi Tîbe-i tayyibe'yi gezend-i Aʿrâb-ı bevâdîden teʾmîn etmişidi. Vücûduna ʿillet târî ve ser-nihâde-i visâde-i bîmârî olup, rebîʿulâhirda terk-i hayât-ı müsteʿâr ve 'azm-i dâru'l-karâr eyleyüp, mahlûl olan mansıbı, Eğriboz Muhâfızı Vezîr es-Seyyid Ahmed Paşa'ya tevcîh olunup, Eğriboz'dan müşârun ileyhi kaldırmak ve Medîne-i münevvere'den müteveffânın emvâl ü eşyâsını getürmek üzere Kapucu-başı Uzun İbrâhîm Bey me'mûr oldu. Rumeli Kadıʿaskeri'nin eyyâm-ı maʿdûdesi karîn-i inkızâ olduğuna binâʾen, sâbıkā Rumeli Kadıʿaskeri Pîrî-zâde ʿOsmân Monla Efendi, o mesned-i refîʿa ber-vech-i tekerrür tesaddur eyledi. Târîh-i mezkûrda sâbıkā İstanbul Kadısı Tokādî Bekir Efendi ve Mekke Pâyesi olup fuhûl-i ʿulemâdan Kilîsî Hüseyin Efendi, irtihâl-i dâr-ı bekā eylediler.