Muharremü'l-harâmın altıncı günü sâhib-i dîhîm ü tâc ve Şehriyâr-ı kerrûbî-mizâc Kara-ağac Sâhil-serâyı'na nakl ile kesb-i neşât ibtihâc buyurdular. Kırım Hânı nasb olunan Selîm Girây Âsitâne'ye daʿvet olunduğuna binâʾen, mâh-ı mezkûrun onuncu günü vusûlleri haberi karʿ-ı sâmiʿa-i devlet eyleyüp, Dâvudpaşa'da yemeklik tertîb ve Sadrıaʿzam ve sâyirleri mahall-i mezbûra varup, icrây-ı resm-i terhîb ʿakībinde tenâvül-i taʿâm ve müretteb alay ile Bâb-ı ʿâlî'ye nüzûl olunup, îfây-ı de'b-i ʿâdîden sonra müzeyyen esb ve bârgîr ve bir sevb-i semmûr irâʾeti ile edây-ı hakk-ı taʿzîm ü ihtirâm kılındığından başka, iki nefer mahdûmlarına birer sevb-i semmûr ve birer müzeyyen esb ve maʿiyyetinde olan sâyir şîrîn ve mîrzâlara kākım kürkler ilbâs ve teşyîd-i esâs-ı iʿtilâf ü istînâs kılınup, Hân-ı müşârun ileyh Bâb-ı ʿâlî'den mükerremen nehzat ve Kaba-sakal'da mukaddemce ferş ü âmâde olunan konağa vusûl ile kesb-i râhat eyledi. Üç beş gün sonra Behâriyye'de hâk-i kadem-i Şâhâne'ye ruhsây-ı ʿubûdiyyet ve suʾâl-i hâtır şerefine neyl ile ihrâz-ı dest-mâye-i mefharet eyleyüp, serâsere kablu semmûr kürk ve müzeyyen esb ile taraf-ı Şâhâne'den manzûr ve serkerem-i sülâfe-i sürûr olduğundan gayri, Küçük-su binişinde dahi bu vechile mükerrem ve ʿavdeti esnâsında kapâniçe taʿbîr olunur semmûr ve nakd-i mevfûr ve gevher-i şemşîr ve incûlü terkeş ile müstağrak-ı deryây-ı niʿam olup, Sadr-ı vâlâ-menkabet, Hân-ı müşârun ileyh ile hem-ʿinân-ı mürâfakat olarak Dâvud-paşa'ya dek ʿazîmet ve icrây-ı resm-i vedâ ile ʿavdet ve anlar dahi [M1 272] Kırım cânibine ʿazîmet eylediler. Evâhir-i saferde Yeniçeri Ağası ʿazl ve Dimetoka'da iskân ve Kul Kethudâsı Hüseyin Ağa mansıbı ile ferhân kılınup, bu takrîb ocağ silsilesi vâkiʿ olup, tarîkleri üzere cümlesi kesb-i pâye ve tahsîl-i istiʿdâd ü mâye eylediler. Eflâk Kapu Kethudâsı İstavraki-oğlu haddini teʿaddî ve muʿzamât-ı umûra tesaddî ve leyl ü nehâr devr-i ebvâb-ı kibâr ve serîre-i devleti istihbâr, hakkında îcâb-ı dimâr etmekle, rebîʿulevvelde Bostâncılar mahbesine kaldırılup, birkaç gün tazyîk u istintâk ve yalısı cenbinde salb ve dûzahîlere ilhâk olundu.