Zilkaʿdenin yirmi altıncı günü [1] Bahr-i sefîd'de be-her sâl ihrâcı muʿtâd olan Donanma-yı hümâyûn'u Kapudân-ı deryâ âlây-ı vâlâ ile pîşgâh-ı hümâyûndan imrâr ve iktisây-ı hilʿat ile kesb-i mesâr eyleyüp, bir iki gün Kabataş'da ikāmet ve tetmîm-i levâzım ile Ak-deniz muhâfazasına ʿazîmet eyledi. Hademe-i Bâb-ı vâlâ-cenâbdan baʿzı kapucu-başılar ve silahşörlerin zîk-ı meʿâş ile teng-dil oldukları maʿlûm-i Pâdişâh-ı deryâ-dil olduğundan, o makūleler hakkında bahr-ı bî-gerân-ı ihsân-ı Şehriyâr-ı devrân mütemevvic ü hurûşân olup, hâllerine göre taksîm olunmak içün vâfir meblağ inʿâm ve deʿavât-ı hayriyyeleri igtinâm olundu. Aydın Sancağı'yla bir seneden berü çeşm-i ibtihâcı rûşen olan Gül Ahmed Paşa-zâde ʿAli Paşa Eyâlet-i Anadolu ile maʿnûn ve Aydın Sancağı hilʿatiyle Kāyim-makām-ı sâbık Vezîr Mehmed Paşa'nın dûş-i istîhâli müzeyyen kılındı. Baʿzı evzâʿ u etvârı hilâf-ı rızâ-yı Tâcdârî olan Vezîr Silahdâr Hamza Paşa'nın kayd-ı Vezâret'i terkīn ve Dimetoka'ya temkîn olunmuşidi. Abyârî-yi ilhâm-ı Hudâvend-i âsumân ü zemîn ile harâret-i infiʿâl-i Şâhâne teskîn ve ibkā-yı Vezâret'iyle mansıb verilen Selânik Sancağı'na taʿyîn olundu. Reʾîsülküttâb-ı ʿUtârid-nisâb olan Mehmed Emîn Efendi, her mâddede izhâr-ı sadâkat ü ihlâs ve bu sebeble taraf-ı hümâyûna kesb-i temahhuz u ihtisâs eyleyüp, evâyil-i zilhiccede [2] Vezâret'le kadri terfîʿ [M1 271] ve Mora ve Nişancılık mansıbları ile hakkında sunûf-i ʿâtıfet-i Şâhâne tenvîʿ olunup, Yeniçeri Kâtibi olan Hammâmî-zâde ʿÖmer Efendi, hidmet-i Riyâset'le mümtâz ve Yeniçeri Kitâbeti ile Nuʿmân Efendi ser-efrâz oldu. Nakībü'l-eşrâf olan Mîrzâ-zâde Efendi'nin ʿillet-i mizâcı, istiʿfâsını îcâb ve asâlet ü nebâleti maʿlûm-i şeyh u şâbb olan es-Seyyid ʿAbdullah Efendi, Nekābet-i eşrâf ile dest-mâye-i hürmet iktisâb eyledi. ʿÎd-i adhâ tehniyesiyçün ictimâʿları iktizâ eden erkân-ı devlet dâmenbûs-i Şâhâne ile kesb-i mefharet eylediler. Mektûbî-yi hazret-i Sadâret-penâhî matʿûnan semt-i âhirete râhî olup, Reʾîs-i benâm Mustafa Efendi merhûmun necl-i meʿârif-irtisâmı ʿAbdurrezzâk Efendi, o hidmet ile şâd-kâm ve mutasarrıf olduğu mevkūfât ile Hâlisa-zâde ʿAli Efendi, nâyil-i merâm oldu.