Müşârun ileyh devr-i Ahmed Hânî'de Sadr-ı ʿâlî-kadr olan Çorlulu ʿAli Paşa merhûmun Kethudâsı ve baʿdehû Vezâret'le gars-i yemîn-i himmet-i vâlâsı olan Vezîr Sûfî ʿAbdurrahmân Paşa'nın mahdûm-i dilârâsı olup, bülûğ-i eşedd ile necm-i şebâbiyyeti büzûg eyledikde, Silahşorân zümresine ilhâk ve bir müddetden sonra kapucu-başılara ilsâk olunup, elli dokuz ramazânında Mîrâhûr-i Sânî ve bir müddetden sonra Büyük Mîrâhûrluk ile nâyil-i aksa'l-gāye-i emânî oldu. Altmış beş şaʿbânında Sadrıaʿzam ve baʿzı hıdemât-ı cesîme ru'yeti ile nezd-i ferd-i Şehinşâhî'de ʿazîz ü muhtarem olmuşidi. Altmış sekizde cülûs-i hümâyûn vâkiʿ olup, sevk-i hilâf-gîrân ile üç mâhdan sonra ʿazl ü tekdîr ve bi-tarîki'n-nefy Limni'ye tesyîr olunup, sene-i mezbûr ramazânında kayd-ı nefyden rehyâb ve Mora Muhassıllığı ile kâm-yâb ve altmış dokuz recebinde Saʿîd Paşa ʿazlinden sâniyen Sadr-ı vâlâ-cenâb oldu. Yetmiş rebîʿulâhırında [M1 270] mesnedinden tenzîl ve Cezîre-i Rodos'a tesbîl olunup, sene-i mezbûra zilhiccesinde visâk-ı gurbetden âzâd ve Eğriboz Sancağı'yla ber-murâd ve yetmiş bir şevvâlinde Mısır mansıbı ile kadri bülend ve ʿâlî ve yetmiş üçde Cidde'ye Vâlî olmuşiken, izhâr-ı butûʿ ü rehâvet ve baʿzı aʿzâr-ı bâride îrâdıyla hilâf-ı rızâ hareket eylediği nuhustîn-i ʿukde-i kalb-i Pâdişâhî olup, ne hâl ise Haleb Eyâleti'yle Mısr-ı Kāhire'den ihrâc ve yetmiş yedide tekrar mühr-i hümâyûn dest-i kifâyetine idrâc olunup, bâlâda tafsîl olunduğu vech üzere ʿazl ve Midillü'de katl olundu. ʿAsr-ı bâhirü'n-nasr-ı Mahmûd Hânî'de müddet-i Sadâreti yirmi dokuz buçuk mâh olup, ʿahd-ı ʿOsmân Hânî'de bir defʿası altmış yedi gün ve defʿa-i sâniyesi sekiz ay yirmi gün ve Şehriyâr-ı zemân vaktinde müddet-i Sadâreti bir buçuk senedir. Müşârun ileyh tamaʿ u hırs ile mevsûf ve kizb ü dürûğ ile meʾlûf olup, âsâr-ı hayriyyeye meyli ve baʿzı mesâcid ü meʿâbid taʿmîri gibi hüsn-i fiʿli mahalleri geldikçe güzâreş-pezîr-i hâme-i tahrîr olmuşdur.