Müşârun ileyh bir buçuk sene mikdârı bu defʿa dahi Sadr-ı devletde kâr-fermâ olup, Kıbrıs hâssına zâmm-ı mâl ile sebeb-i şûriş ü kıtâl olduğundan başka, kemâl-i hırs u tamaʿ ile Âsitâne ve hâric-i Âsitâne'de bulunan erbâb-ı servet ü sâmânı birer vesîle ile tecrîm ve bilâ-mûcib Âsitâne'de baʿzı serây binâ ve hedmiyle izâʿat-i mâl-ı ʿazîm eyleyüp, sirran ve ʿalenen ahvâli taraf-ı hümâyûndan teftîş ü tashîh ve baʿzan nâzikâne tenbîh ile vehâmet-i âkıbet telmîh olunmuşiken, kizb ü dürûğ ile ahvâlini ihfâ ve lağviyyât ü ebâtîl ile zimmetini ibrâ eyler idi. Bilâhare ʿazl ile dâyire-i saltanatdan tebʿîd ve musâdere-i emvâl ile tehdîd olundukdan sonra, mecrûh-i şeş-per-i gadri olanlar seyyi'âtını yek-be-yek şümârende-i benân ve hakkında tehyîc-i gazab-ı Hâkān-ı zemân et- meleriyle, mübâşiri olan Kapucu-başı Kelleci ʿOsmân Ağa'ya hatt-ı nihânî ile Hasekî irsâl ve Midilli'de kaydı görülüp, ser-i maktûʿu mevzû-i siyâset-gâh-ı eşrâf ü enzâl kılındı.