Sevdâ-zedenin biri mücevvef bir sandık îcâd ve derûnuna baʿzı silâh teşhîn ve i'dâd ve Sultân Ahmed Câmiʿi hâricinde vâkiʿ Dikilitaş kurbuna vazʿ ve: “Âsumâna ʿurûc edeceğim” deyü jâjhâ olmağla ahz ve tîmârhâneye defʿ olundu. Âhır-ı erbiʿây-ı saferde Mehmed Emîn Efendi, Defterdârlık'dan ʿazl ve o yevm-i nahs-i müstemirde ʿAvnî Efendi yerine vasl olundu. Mukaddemâ Yanya Mutasarrıfı iken, zulm ü iʿtisâfı sebebi ile Vezâreti refʿ olunduğunu istihbâr ve Arnabudluğ'a firâr eden Vezîr İsmâʿîl Paşa, mukterif olduğu hatî'et ü havbeden istiğfâr ü tevbe eyleyüp, Vezâret'i ibkā olunmuşidi. Müşârun ileyh yine hâlinde durmayup, pâ-nihâde-i zirve-i lecc ü ʿinâd ve rehrev-i girîve-i ʿutuvv ü fesâd olup, Avlonya ehâlîsi ile fuzûlî işʿâl-i nâyire-i harb ü nizâl ve maʿrekede kurşun ile urulup, [M1 263] müte'essiren dârü'l-cezâya intikāl eyledi. Bâb-ı ʿâlî'de Sadrıaʿzam dîvânda hâzır iken mîrâs iddiʿâsıyla bir şahs-ı tebehkâr dîvân kalemi küttâbından hasm ittihâz etdiği Fâhir nâm kimseyi bıçak ile zahmdâr edüp, dîvân yerinde kasd-ı telef-i nefs etdiğiyçün ahz ü habs olundu. Vezîr ʿAbdî Paşa, Aʿzâz ve Kilis'den ʿazl olunup, Trabzon Eyâleti'yle memnûn ve selefi Vezîr Nuʿmân Paşa'nın Van Eyâleti'ne irsâli emr-i hümâyûn olup, Aʿzâz ve Kilis sancaklarıyla Hâs Ağası Ahmed Paşa'nın kadri efzûn oldu. Âsitâne-i saʿâdet'de müttekî-yi visâde-i râhat olan Rumeli Vâlîsi Muhsin-zâde Vezîr Mehmed Paşa ve Anadolu Vâlîsi Vezîr Silahdâr Mehmed Paşa, işbu rebîʿulevvelin yirmi üçüncü günü mansıblarına râhî olmaları irâde-i hazret-i Pâdişâhî oldu.