Mûmâ ileyh devr-i Mahmûd Hânî'de Enderûn-i hümâyûn'a çırâğ olup, üsve'-i hâl ile imrâr-ı guduvv ü âsâl eyler iken, Hâkān-ı zemân ʿasrında nahl-i emeli bâr-âver-i ikbâl olup, rüşd ü istiʿdâdına nazar ve Kahveci-başılık ile kadr ü iʿtibârını füzûnter buyurduklarından gayri, Hazîne Kethudâlığı'ndan muhrec mütevaffâ Vezîr Halîl Paşa mahlûlünden yetmiş kîse fâyizlü bir mukātaʿa dahi bilâ-muʿaccele merkūma ihsân ve inʿâmât-ı sâyire ile vâreste-i muzâyaka-i dehr-i bî-emân kılınmışidi. İktizây-ı mahlas ile baʿzı umûrda münâkaşa vü mücadele ve muʿzamât-ı hutûb-i devlete müdahale tedrîcî hayyiz ü rağbetini izâle edüp, bir zemân sâkıt ʿani'l-iʿtibâr geşt ü güzâr ve istiskâl olunduğunu ağyârdan istitâr edüp, hücûm-i endûh ü ekdâr cânına kâr eyleyerek ʿâkıbet hasta vü bîmâr ve evâhır-ı rebîʿde ʿâzim-i dârü'l-karâr oldu. Mûmâ ileyh sahî ve civân-merd ve kāniʿ ü hursend bir şahs-ı tenûmend olup, Enderûn-i hümâyûn'da bî-îrâd olanlara yed ü lisânıyla imdâd ve kati çok mekkâre-i ahvâle kuvvetu'z-zahr-ı temânüʿ u sedâd olmuşidi.