Mûmâ ileyh saferu'l-muzafferin yirmi ikinci rikâb günü Enderûn-i hümâyûn'da kahve fincanı yedinde iken, mevt-i fücâ'î ile ʿâlem-i fânîden baʿîd ü nâ'î oldu. Sadrıaʿzam Mektûbcusu olan Mehmed Emîn Efendi'nin kābiliyyet ü istiʿdâdı zâhir ve efânîn-i aklâma vukūfu evzahu min bedri's-sâfir olduğuna binâ'en, yevm-i mezkûrda hidmet-i refîʿa-i riyâsetle tatrîb ve Resmî Ahmed Efendi Mektûbculuk ile tatyîb olundu. Mütevaffâ-yı mûmâ ileyh Sadr-ı maktûl İbrâhîm Paşa'nın Mühürdârı olup, müddet-i medîdeden berü Tezkirecilik hidemâtında istihdâm olunup, kavânîn-i devlete riʿâyet ve mezlaka-i kadem olan umûrdan mücânebet ve ihtilât-ı nâsdan mübâʿadet üzere olduğundan, cümleye zâtı maʿlûm ve menâsıb-ı devletden gayr-i mahrûm olup, giderek Riyâset-i Defterdârlık gibi menâsıb-ı celîlede müstahdem ve her mansıbda şöhreti ke-nârin ʿalâ ʿalem olmuşidi. Ancak maʿarrat-i cehlden vâreste olacak kadar kesb-i hünere zemân müsâʿid olmayup, tahrîrâtı habt ü halelden ve kelimâtı lahn ü zelelden hâlî olmayup, kesret-i emvâl ü nukūd ile tüvângerân-ı zemânaden maʿdûd iken, imsâk ü buhl ile mezmûm ve âsâr-ı hayriyye ve istınâʿ-ı maʿrûfa muvaffak olamadığı erbâb-ı tahkīka maʿlûmdur.