Saksonya Eyâleti, cenûbden şimâle mümted olmuş bir tûlânî hutta olup, cenûb tarafına Yukarı Saksonya ve şimâl cânibinde bahra mücâvir olan semtine Aşağı Saksonya taʿbîr olunmağla, Brandeburg memleketi bu Saksonya Eyâleti'nin böğründe aslında Saksonya'dan maʿdûd bir sancak yer olup, Yanık Kalʿa maʿnâsıve Brandeburg Şehri, Berlin Nehri'ne muttasıl Hâbil nâm nehir kenârında fi'l-asl Brandeburg elektörlerinin makarr-ı emâreti olmağla, bu nâmla şöhret bulmuşlardır. Brandeburg Kalʿası, Berlin'e on altı sâʿat buʿd ile Berlin'in cânib-i garbîsinde bir şehr-i muhtasardır. Bundan gayri Nemçe Memleketi içinde şunda bunda birkaç parça yerleri dahi vardır. Prusya Sancağı, Brandeburg'dan iki yüz sâʿat cânib-i şarka Leh ve Moskov memleketlerine mücâvir olup, bunun yanında Pomeranya nâmına Bahr-i Baltık'a muttasıl bir parça yerleri dahi vardır. Kral'ın ecdâdı aslında [M1 261] dükalık ve elektörlük ile Brandeburg'da Nemçe Devleti himâyetinde iken, yetmiş sene mukaddem Moskov ile Şved [İsveç] beyninde hâdis olan külliyyetli cengler esnâsında Kral'ın ikinci ceddi işe karışup, o keşmekeşler hilâlinde Prusya'ya mâlik ve Prusya Krallığı nâmını tahsîl etmiş[tir.] Ol zemândan berü tevsîʿ-i dâ'ire-i emâret kasdıyla Berlin şehri taʿmîrine sarf-ı himmet ve mâlik oldukları yerlerin nizâmına gayret eyleyüp, Berlin'i makarr-ı emâret ittihâz etmişler. Şimdiki kral, tevârîh-âşinâ ve ceng ü cidâlden bî-pervâ bâlâ-pervâz âdem olmağla, ecdâdının mülküne kanâʿat etmeyüp, yüz elli üç târîhi hilâlinde pederinin vefâtı Nemçe Çâsârı Altıncı Karlos'un rıhletine mürâdif ve Nemçe Devleti'nin ihtilâli zemânına musâdif olmağın, imparatorluk sevdâsıyla Françe Devleti'ni kendüye uydurup Nemçe üzerine kalkmış ve ol zemânda Nemçeliler'in mâ-bihi'l-iftihârı olan Silezya Nâhiyesi'ni ihtilâs etmiş idi. Silezya mâddesi bir derd-i nâ-devâ olmağla, mürûr-i zemânla miyânelerinde küllî cidâl ü münâzaʿaya mü'eddî ve Saksonya Eyâleti'nin pâymâl olmasına ve bilâhare Françe ve Moskov devletlerinin Brandeburg ʿaleyhine ittifâk etmelerine bâʿis olmak keyfiyyetleri meşhûrdur. Bu behânelerle Brandeburg Kral'ı, vilâyetinin tehammülünden ziyâde asker tedârüküne bezl-i miknet ve leyl ü nehâr Silezya Sancağı muhâfazasına sarf-ı himmete muztarr olmuşdur.