Bu belde Silezya'ya mücâvir hudûd kalʿalarından pây-ı taht-ı kadîmleri bir büyük şehir olup, Leh krallarının tâc giydikleri ve bilâhare defn olundukları mahal olduğundan gayri, Morava mânendi Veşle nâmında bir nehrin kenârında vâkiʿ olup, nehr-i mezbûr bu beldenin yanından cereyân ve cânib-i şarka tekavvüs ile kasabât ve kurâ yanından mürûr ve hâlâ makarr-ı emâretleri olan Varşav nâm şehre uğradıkdan sonra ondan aşağı sâhil-i bahr-i şimâlîde hâlâ Leh memleketinin berren ve bahren maksem-i erzâk ve mecmaʿ-i ticârât-âfâkları olan Daniska şehri önünde bahra vâsıl olmağla, bu nehirden Leh diyârına menâfiʿ-i külliyye hâsıldır. Daniska şehri etrâfında bir pâre yer ile her ne kadar başka bir cumhûr zabtında ise cumhûr-i mezkûr Leh devleti himâyetinde olmağla, Leh vilâyetinden maʿdûddur.