Belde-i mezkûre Leh memleketinin cânib-i cenûbîsinde Kamaniçe'ye tâbiʿ olan Podolye Eyâleti'nin muʿteber şehirlerinden, kalʿalı varoşlu bostanlı bağçeli bir güzel mahal olup, ber-vech-i mübeyyen bin seksen üç târîhinde Kamaniçe Kalʿası muhâsara esnâsında Kamaniçe'ye tâbiʿ olan yerleri tâht ü târâca meʾmûr Selîm Girây Hân'la Haleb Vâlîsi Kaplan Paşa, memleket-i aʿdâyı bu mahalle dek gāret ve be-tahsîs bu beldeye top u tüfeng ile imkân-ı mertebe îsâl-i hasâret etmeleri âsârından yâdigâr olmak üzere hâlâ kenîselerinin birinde bir gülle-i bârû-güzâr, âvihte-i tâk-ı iʿtibâr kılınmış olduğu manzûr ve bu beldeyi ol zemânda vukūʿ bulan sulh esnâsında seksen bin guruş pîşkeş ile istihlâs ve istibkā eyledikleri tevârîhde mestûrdur. Bu mahalle varınca arâzîleri kurşûnî siyâh toprak olup, mâverâsı kumsaldır. Bundan üç gün sonra büyük hatmana mahsûs Musteçka nâm kasabaya varılup, anda hatmana mülâkāt ve sohbet ve iki gün ikāmet ile icrây-ı lâzime-i zıyâfet kılındı. Bundan on iki sâʿat öte Turla'ya muʿâdil Som nâmında bir ne- hirden geçilüp, Breslav nâm şehre varılmışdır. Bunun dahi eskice kalʿası olup, bilâd-ı muʿteberlerinden maʿdûddur. Bundan altı günde elli bir 'arzında Krakova nâm beldeye varılmışdır.