Sadrıaʿzam ve bedr-i efhamın mahdûmları bülûg-i rüşde karîb ve henüz hilye-i sünnet ile ârâste olmadıkları mesmûʿ-i Şehriyâr-ı hıredmend-i erîb olup, sûr-i hitâna şurûʿ olunmak husûsu taraf-ı Sadâret-penâhî'ye işrâb ve emr-i hümâyûna imtisâlen tehniye-i levâzım ü esbâb olunup, muharremü'l-harâmda tertîb-i ziyâfet ve erkân-ı devlet nevbet be-nevbet Bâb-ı ʿâlî'ye daʿvet olunup, çengi ve sâyir sâzende vü bâzendeye ruhsat ve herkes sanʿatını icrâ ile kulûb-i nâsa ilkāy-ı hizzet [M1 239] ü ferhat eylediler. Ziyafet ve sûr kemâle resîde ve bir vakt-i saʿîdde mehâdîm-i müşârun ileyhin hadd-i mesnûn üzere kalem-i nev-demîdeleri berîde kılındığından başka, etfâl-i fukarâdan vâfiri istishâb ve iksây-ı esvâb ile sûr-i hitâna idhâl ve ferdâsı Şehriyâr-ı hamîdü'l-hısâl mücerred tehniye-i hitân zımnında Sadrıaʿzam tarafına Kapu Ağası vesâtatıyla bol yenli bir sevb-i semmûr ve müzeyyen bir re's esb ve bârgîr ve zî-kıymet bir elmas hâtem irsâl ve ser-i iftihârını küngüre-i târem-i aʿlâya îsâl buyurdular.