Muharremin on altıncı sülesâ günü sunûf-i ʿasâkir-i zafer-me'âsirin bir kıst mevâcibleri ihrâc olunup, kabzına me'mûrlara teslîm ve ʿakabinde rüsûmât-ı mukanne-ne icrâ vü tetmîm olundu. Cığala-zâde serâyı ittisâlinde nevbâve-i hadîka-i saltanat olan kerîmeteyn-i Şehinşâhî'ye binâ olunan Çifte-serâylar Şehr-i mezkûrda resm-i evfak ve ahsen-i nesak üzere hıtâm-pezîr ve her biri reşk-fermây-ı Havernak u Sedîr oldu. Zîb-ârây-ı mesned-i Anadolu olan Nâfiz Efendi, itmâm-ı müddet-i muʿtâde edüp, Sadâret-i mezkûre ile Muhsin-zâde'nin gonçe-i emeli küşâde kılındı. Karaman Vâlîsi Vezîr ʿAbdî Paşa, ʿazl ve Kilis ve Aʿzâz sancaklarına nakl olunup, Adana ilhâkıyla Karaman Eyâleti, Vezîr Çelik Mehmed Paşa'ya ihsân ve ʿuhdesinde olan Anadolu Eyâleti'yle Silahdâr Mehmed Paşa cezlân ve Aydın Sancağı'yla, Adana Vâlîsi Gül Ahmed Paşa-zâde Vezîr el-Hâc ʿAli Paşa, gül-i nev-şüküfte gibi handân ve bu mazmûnda cümlesine ısdâr-ı fermân olundu. Sâbıkā Mısır Kadısı Niʿmet Efendi, Mekke-i mükerreme Kazâsı'yla dilsîr-i niʿmet ve Edirne'den maʿzûl Arslan-zâde Mustafa Efendi, Medîne-i münevvere Kazâsı'yla nahcîr-rubâ-yı saʿâdet oldu. Kilîsî Hüseyin Efendi, hilye-i ʿilm ile pîrâste ve nazar-ı ʿâtıfete şâyeste olduğuna binâ'en, Medîne-i münevvere Pâyesi'yle iʿzâz ve Nâşid Mehmed Efendi, Üsküdar ve Tokādî Mustafa Efendi, Yenişehir ve Esʿad Efendi dâmâdı Dervîş Efendi, İzmir ve Samakovlu Hasan Efendi, Kuds-i şerîf kazâlarıyla mümtâz kılındılar.