Nemçe Hersekleri'nden birinin duhteri olan Katerina, Moskov İmparatoru'na varup, kefere memleketlerinde nisvânın zükûra galebesi emr-i tabîʿi olduğuna binâ'en, giderek mesfûrede nüfûz hâsıl ve İmparator'a galebesi derece-i kemâle vâsıl olup, bu mahkûmiyet-i mutlaka iʿtibârını selb ve zevcesi mesfûreye îcâb-ı kuvve-i kalb edüp, İmparatorluk buhârı dimağına suʿûd ve Moskovlu'yu zevcinden tebrîd ü tevşîh ile izhâr-ı hukūd edüp, Moskovlu'nun ru'esây-ı askerîsi merkūmeye pâ-beste-i meyl ü tevâd ve baʿzı ʿuhûd ile zevcini iʿdâm ve kendüsünü İmparator etmeğe safka-zen-i ittihâd olmalarıyla, yine hem-hâki olanlardan Orloflar cümleden evvel nâr-ı fitneyi işʿâl ve İmparator'u iʿdâm ü istîsâl ve mesfûreyi İmparatorluk mastabesine ikʿâd ile fi'l-hâl defʿ-i şûriş ü ihtilâl eyledikleri ahbârı, tafsîl-i hâlden ʿârî mefhûm ile resmen Der-i devlet-medâr'a inhâ ve ʿâdet-i kadîmeye riʿâyeten bir elçi irsâli istidʿâ olunmuş idi. Teceddüd-i nevbet-i hükûmet hilâlinde mülûk-i Nasârâ'ya taʿyîn-i sefîr kānûn-i Devlet-i ebed-masîr olduğuna binâ'en, sâl-i mezkûr evâ'ilinde Sipâh Kâtibi bulunan Dervîş Efendi, Orta Elçilik ile taʿyîn olunup, levâzımâtı taraf-ı mîrîden tanzîm ü tertîb ve birkaç günden sonra o tarafa tesrîb olundu.