Sevâhil-i Bahr-i sefîdi muhafaza içün beher sâl Kapudan Paşa bulunanların mevsim hulûlünde hareketleri muʿtâd olduğuna binâ'en, şehr-i merkūm evâhırında Kapudan Paşa Donanma-yı hümâyûn ile Bahr-i sefîd'e şirâʿ-güşâ oldu. Topçu-başı-yı sâbık Emîn Ağa, gālibâ Ağalığ'a talebkâr ve ʿameli [ol] vakt-i ağasına âşikâr oldukda evvelce davranup, merkūmu Burusa'ya nefy etdirmekle, tahsîl-i sükûn ve defʿ-i halecân-ı derûn eyledi. [M1 238]. Mehmed Emîn Ağa-zâde Sâdık Ağa, birkaç gün haste ve mebnây-ı mînây-ı vücûdu seng-i ecel ile şikeste oldu. Târîh-i mezkûrda Yeniçeri Ağası dahi mansıbdan dûr ve yeriyle Kul Kethudâsı mesrûr oldu. Zilhiccenin onuncu gicesi ʿumûmen erkân-ı devlet Serây-ı hümâyûnda kadeh-zened-i cemʿiyyet eyleyüp, subh-i sâdık nümâyân oldukda, Hakān-ı ferhunde-baht zînet-bahş-ı taht olup, aʿyân-ı saltanat ʿalâ ihtilâf-i tabakātihim takbîl-i dâmen ve zeyl-i Şâhâne'leriyle iktisâb-ı sermâye-i behcet eylediler.