Şehriyâr-ı kerem-muʿtâd, Sadrıaʿzam'ı dâmâd ve şeref-i sıhrıyyet ile dilşâd etmek niyyet-i hâlisânesinde olduklarına binâ'en, şevvâlin yirmi ikinci günü ʿismetlü Şâh Sultân-ı ʿaliyyetü'ş-şân hazretlerini müşârun ileyhe nâmzed buyurup, taraf-ı Sadâret-penâhî'den lâzım gelen nişân takımı ki, cevâhir-i girân-behâ ve nevâdir-i dünyâdan ʿibâret idi. Nahl-i semîn ve ezhâr-ı rengîn ve şekerlemeden masnûʿ eşkâl-i dil-nişîn ile vezîr ağaları dest-ârây-ı iʿzâz olarak Serây-ı hümâyûn'a îsâl eyleyüp, Dârü's-saʿâde Ağası huzûrunda Sadrıaʿzam Kethudâsı telebbüs-i ferve-i semmûr ile mübeccel ve sâyir erbâb-ı alay dahi hilaʿ-ı fâhire ile nâyil-i fahr-ı ecel oldular.