Haleb kadısı Seyyid Ahmed Efendi-zâde ehâlî ile geçinemeyüp, hırs u tamaʿına dâ'yir o tarafdan ʿarz u mahzar vârid olmağla, li-ecli't-te'dîb Konya'ya nefy ü tagrîb olundu. Baş-muhasebeci Hâşim ʿAli Bey, Edirne'de zelzeleden müşrif-i harâb olan Üç Şerefeli Câmiʿi'nin binâsına taʿyîn olunmuşidi. Fiʿlinde rehâvet ve dâd ü sitedinde izhâr-ı şübhe vü raybet eyleyecek baʿzı hâlet vukūʿundan, me'mûriyyeti Edirne sükkânından Süleymân Paşa dâmâdına tahvîl ve kendüsü Edirne'de ikāmet etmek üzere tarafına hitâben ısdâr-ı emr-i celîl kılındı. Pâye-i Kudüs ile ʿulemânın ser-efrâzı ve ʿilm ü fazlda sânî-yi Râzî olan Torun Mehmed Efendi, Mısr-ı Kāhire Kazâsı'yla mükerrem ve Şâfiʿî Seyyid Mehmed Efendi, Şâm-ı cennet-meşâmm Kazâsı'yla tenaşşuk-i nesîm-i İrem ve Mekkî Efendi, Selânik Kazâsı'yla muhterem oldu. Bir müddetden berü Kazâ-yı vesîʿu'l-ercây-ı Anadolu'da ferîk-ı dalâlet-tarîk evbâş ile katʿ-ı tarîk ve fukarâ vü zuʿâfânın câme-i âsâyiş ü râhatlarını [M1 237] temzîk eden Kadı-oğlu, Çapar-zâde sadmesinden hezîmet ve firâr ile Konya Eyâleti'ne doğru râyet-keş-i idbâr olmuşidi. Karaman Vâlîsi Vezîr ʿAbdî Paşa, merkūmun üzerine varup, cüz’î muhârebeden sonra cemʿiyyetini perîşân ve hazele-i mezkûre dahi üftân ü hîzân Kızılırmak'dan güzerân olur iken, bir mikdârı garîk-ı nehr-i sâyil ve bir mikdârı sâhil-i selâmete vâsıl olup, Aşkar Ovası'na henüz nâzil olmuşlar iken, Sivas Vâlîsi Vezîr Feyzullah Paşa yetişüp, tarafeyn biribirinden haberdar olarak tarh-1 encümen-i kâr-zâr ve i'mâl-i seyf-i betâr ve rumh-i hatâr ile niçeler terk-i serv zahmdâr olup, nesîm-i zafer Paşa-yı nâmver tarafında vezân ve levendler müteferrik u perîşân olup, Kadı-oğlu ve otuz kadar bölükbaşılar meydân-ı maʿrekede maktûl ve ru’ûs-i maktûʿaları Âsitâne-i saʿâdet'e müşârun ileyh tarafından mevsûl olup, eşkıyây-ı merkūmenin müdebbirleri olan nâ-halef telef ve gāyile-i mezkûre fazl-ı Hak ile bertaraf oldu. Deryây-ı şecâʿatin nehengi ve Rüstem-i destânın hemrengi olan Caʿfer Bey, sayd-ı aʿdâ zımnında geşt-i deryâ eder iken, Maltalu'nun sagīrce bir gemisine tesâdüf edüp, bilâ-emân teshîr ve derûnunda bulunan on nefer cengçilerini beste-i zencîr eyleyüp, Âsitâne-i saʿâdet'e îsâl ve hidmeti makbûl-i Şehriyâr-ı deryâ-nevâl olduğundan, huzûr-ı Sadru's-sudûrda bir sevb-i ferve-i kākum ve beş bin guruş ʿatıyye ve zamm-ı sâlyâne ile münşerihu'l-bâl oldu.