Kânûn-i Devlet-i ebed-müddet üzere leyletü'l-ʿîd cümle erkân-ı devlet, takbîl-i dâmen-i Pâdişâhî ile ʿîd-i ber-bâlâ-yı ʿîd eylediler. Şevvâlin altıncı günü tevcîhât vukūʿ bulup, ricâl-i bâb ve defterdârân ve Tevkīʿî ve Defter Emîni ibkā olunup, Büyük Tezkirecilik, Nâyilî Paşa birâderi Vahdetî Ebûbekir Efendi'ye ve Küçük Tezkirecilik, Penâh Süleymân Efendi'ye ve Rûznâmçe-i Evvel, Râkım Efendi'ye ve Baş-muhasebe, Sârım Efendi'ye tevcîh olundu. Şehir ve Tersâne ve Darb-hâne mutasarrıflarına ibkā ve Matbah Emâneti, Ağa-zâde Hüseyin Ağa'ya ve Arpa Emâneti, Subhî Efendi'ye; Anadolu, Elmâs Paşa-zâde'ye; Süvârî, ʿAkif Bey'e; Muhâsebe-i Haremeyn, Benli-zâde'ye; Yeniçeri Kitâbeti, Defterdâr-ı sabık İbrâhîm Efendi'ye; Sipâh Kitâbeti, Dervîş Efendi'ye; Silahdâr Kitâbeti, ʿArif Süleymân Bey'e; Cizye Muhasebesi, Çukadar Ağalık'dan muhrec Hâfız Ahmed Efendi'ye; Mevkūfât, Yazıcı-yı sâbık ʿAbdullah Efendi'ye tevcîh ve Mâliyye, Merâkī Hüseyin Efendi'ye ibkā ve sâyir menâsıb dahi erbâbına tevcîh olunup, mansıbdan me'yûs olanlara dahi ʿalâ tefâvüt-i merâtibihim nukūd iʿtâ olundu. Yevm-i mezkûrda vüzerây-ı ʿizâm tevcîhâtı dahi vukūʿ bulup, sâbıkā Bosna Vâlîsi, Muhsin-zâde Vezîr Mehmed Paşa'ya Rumeli Eyâleti ve selefi Vezîr ʿAli Paşa'ya, Bosna Eyâleti; Mîr-i mîrândan Receb Paşa'ya, rütbe-i Vezâret'le Özi Eyâleti; Silahdâr Hamza Paşa'ya, Vidin Muhafazası; Köprülü-zâde Vezîr el-Hâc Ahmed Paşa'ya, Bender Muhafazası tevcîh ve sâyir eyâlât ü elviye dahi vüzerây-ı ʿizâm ve mîr-i mîrân-ı kirâma tevcîh ü ibkā olundu.