Yanya Mutasarrıfı Mîr-i mîrân Selmân Paşa'nın şükâtı rikâb-ı müstetâbı taʿcîz ve tenbîh ü te'kîdden hisse-mend olmayup, ser-i felâket-zedesine havâle-i tîg-i [M1 234] sertîz ve mevzûʿ-i nazargâh-ı zelîl ü ʿazîz kılındı. Anadolu taraflarında geşt ü güzâr ile fukarâyı ızrâr eden evbâş-ı levendâtın sergerdeleri Kadı-oğlu nâm kimse maʿiyyetinde olan eclâf ile Niğde taraflarını tâht ü târâc eylediğini Çapar-zâde Ahmed Paşa tashîh ile ılgār ve zikr olunan eşrârı basup, yüz altmış mikdârını îsâl-i dereke-i nâr ve bakıyyetü's-süyûfu Karaman Eyâleti tarafına firâr eylediklerini işʿâr etmekle, Karaman Vâlîsi Vezîr ʿAbdî Paşa'ya istîsâlleriyçün hükm-i cihan-mutâʿ ısdâr olundu.