Müşârun ileyh halîle-i celîleleri ʿiffetlü Zeyneb Sultân hazretlerinin Serây-ı ʿâlîlerinde birkaç gün zânû-zede-i visâde-i bîmârî ve şaʿbânü'l-muʿazzamın sekizinci günü müntakıl-i civâr-ı rahmet-i Kird-gârî olup, ʿuhdesinde olan Nişâncılık, Re'îsülküttâb-ı sâbık Nuʿmân Efendi'ye tevcîh olundu. Müşârun ileyh Hudâvendigâr-ı esbak Sultân Ahmed Hân subbet ʿaleyhi şe'abîb-ü rahmeti'r-Rahmân hazretlerinin vüzerâsından olup, sinni-yi ʿömrü sekseni mütecâviz idi. Sinek Mustafa Paşa şöhretiyle elsine-i ʿavâmda mezkûr olduğuna nazaran fevtine, mâte'z-zübâb (مات الذباب) târîh vâkiʿ olması ittifâkıyyât-ı garîbedendir. Maktûl İbrâhîm Paşa'nın hafîdi olup, o hengâmelerde tabʿına sıklet ve ʿaklına cüz'î hiffet ʿârız olup, ʿilâc-ı rûhânî ve devâ'-i cismânî ile tashîh-i mizâc ve lüknet-i lisân ile mütekellim bir Vezîr-i sâhib-i imtizâc idi. Evâyil-i hâlinde nemâdâr bir mansıba nâyil olmayup, ekser İç-il ve Trabzon ve Van mansıblarıyla ʿömrü güzerân olup, bir mahalden bir mahalle ʿazîmetinde dâiresini zabt ü idâreden ʿâciz ve etbâʿının nehb ü gāretlerinden fukarâ müşme'izz idi. Evâhır-ı ʿömründe refâh-ı hâl ve âsâyiş-i bâl ile ʿömrü güzâr ve menâsıb-ı kesîrü'l-cedvâ ile kulûb-i emsâli dağdâr eyledi. Şaʿbânü'l-muʿazzamın on birinci günü kısteyn mevâcibi ihrâc [M1 232] olunup, eyâdî-yi emânetkârâna teslîm ve devr ʿakabinde Rikâbdâr Ağa vesâtatıyla şeref-resân-ı vürûd olan teşrîfât-ı seniyye kadr-ı Sadrıaʿzamî'yi tefhîm eyledi.