Kapudân-ı deryâ olan Karabâgī Vezîr Süleymân Paşa, fenn-i deryâda mütefennin ise dahi ihtiyâr ü müsin olup, umûr-i Donanma-yı hümâyûn'u idârede ʿaczi zâhir ve zabt-ı haşerât-ı neferâtda kusûr-i zarûrîsi maʿlûm-i Sadr-ı saʿîdü'l-me'âsir olmağla, mikdâr-ı vâfî maʿîşet ile Rodos'da ikāmeti irâde ve bu mazmûnda tarafına emr-i celîlü'ş-şân firistâde olunup, Kāyim-makām bulunan Vezîr Mehmed Paşa'ya Kapudanlık kürkü iksâ ve Sayda Vâlîsi ʿAzm-zâde Mehmed Paşa, Vâlî-yi Halebü'ş-şehbâ olup, Sayda, Eğriboz Mutasarrıfı el-Hâc Ahmed Paşa'ya iʿtâ olundu. Kapudân-ı sâbıkın Kethudâsı ʿAli sevâhil-i Bahr-i sefîd'e müstevlî olup, o havâlîde mütemekkin İslâm ve reʿâyâyı envâʿ-ı zulm ü cevr ile mütekeddir ve tecrîm ü tağrîm ile müte'ellim ve mutazarrır eylediğinden, fevc fevc Âsitâne'ye gelüp, hâl-i pür-melâllerini inhâ ve birkaç defʿa rikâb-ı hümâyûna refʿ-i rukʿa-i iştikâ etmeleriyle keyfiyyet bî-garaz kimselerden su'âl ü teftîş olundukda, reʿâyânın sıdk-ı müddeʿâlarını te'yîd eylediklerinden merkūmun kaydı görülüp, ser-i maktûʿu galtân-ı meydân-ı hızy ü hızlân kılındı. Menâsıb-ı Devlet-i ʿaliyye birkaç âdeme inhisâr ile sâyir ricâl-i devlete ye's ü hirmân ve inkisâr-ı kulûb îrâsı hilâf-ı meşreb-i Sadr-ı cedîd olduğundan; Utavvifü mâ utavvifü sümme âtî ilâ beytin kāʿidetühü lekâ'in mefhûmuna mâ-sadak bulduğu Kâşif Mehmed Emîn [M1 231] Efendi'yi Kethudâlık'dan ʿazl edüp, Recâ’î Mehmed Efendi'yi Kethudâlığa intihâb ve ʿİvaz Paşa-zâde ʿAli Bey'i Çavuş-başı ve Defterdâr-ı sâbık ʿAbdî Efendi'yi Re'îsülküttâb eyledi. Belgrad'a nizâm veren Vezîr ʿAbdî Paşa hakkında Belgrad muhâfazasında olan yamakların kârgüzârlarını mücerred tamaʿa mebnî izâle ile: “Serhadd-i Pâdişâhî'nin kuvvet ü zahrını şikest ve ʿırz-ı ocağı pest eyledi” deyü ocağlu beyninde güft-gû hâdis ve ferkaʿa-i esâbiʿ makūlesinden olan gürültü ile Vezâret'i refine bâʿis olmuşlar idi. O makūle şedîdü'ş-şekîme ve Devlet-i ʿaliyye'nin maslahatına yarar Vezîr'in menkūb kalması revâ görülmeyüp, Vezâret'i ibkā ve Karaman Eyâleti menşûru yed-i istihkākına iʿtâ olunup, selefi Vezîr Çelik Mehmed Paşa, Anadolu Eyâleti'yle kesb-i tefavvuk u iʿtilâ eyledi. Kethudây-ı sâbık Kâşif Mehmed Efendi, min külli'l-cihât manzûr ve maʿzûlen hânesinde ikāmeti tabʿan menfûr-i Pâdişâh-vakûr olduğuna binâ'en, evâyil-i receb-i şerîfde Râkım Mehmed Efendi ʿazlinden Defterdârlık ile nâyil-i etemm-i sürûr oldu.