Müteveffa Çeteci Vezîr ʿAbdullah Paşa'nın Kethudâsı Sâlih Ağa, rüşd ü reviyyet ile meşhûr ve Çeteci dâyiresini idâre ile müşârun ileyhin şânını mevfûr eylediği maʿlûm-i evliyây-ı umûr olduğundan, Paşası vefâtından sonra zümre-i mîr-i mîrâna idhâl ve Adana Eyâleti ile makzıyyü'l-âmâl kılınmışidi. Sadrıaʿzam Adana'dan murûr eder iken hidmetinde kıyâm ve Vezâret ihsân olunması bâbında niyâz ü istirhâm etmiş idi. Hattâ Sadrıaʿzam: “Senin mukaddemâ sît ü şöhretin kemâle resîde ve Çeteci tedbîr-i dil-pezîrin ile beyne'l-vüzerâ memdûh ve serkeşîde olmuşiken, el-hâletü hâzihî elinden bir maslahat gelmez gibi Adana'da ikāmetin mûcib-i teʿaccübdür” dedikde: “Belâ, mâdde ʿaynî ile buyurduğunuz gibidir. Lâkin o mevsimlerde müstenidim Çeteci gibi ʿazîmü'ş-şân bir Vezîr olup, sît-ı bülendiyle hutûb-i ʿizâma iktihâm ve niçe müşkilât-ı umûra nizâm verir idim. Ancak şimdi muʿîn ü zahîrim olmadığından şâʿirin: Serâpâ cevherem çün tîg ammâ der keff-i gîtî Zi-men-kârî neyâyed harbe-i nâmerd râ mânem mefhûmu mâ-sadak-ı hâlim oldu. İʿânet ü himmet ile matlabım olan Vezâret'e nizâm verilür ise [mısrâ]: Ben yine ol merd-i çâlâkım ki nâmım söylenür, Hidmet-i devletde kusûr ve mütehammil-i ʿuhde-i ʿâcizânem olan umûrda irtikâb-ı fütûr etmem” kelâmıyla mühür-zen-i leb-i sükût oldukda, bu mukaddime-i rikkat-engîzi kalb-i Sadâret-penâhîye te'sîr ve Vezâret'le tebşîr etmişidi. Sadr-ı müşârun ileyh Âsitâne'ye vürûdunda rüşd ü reviyyetini ʿarz-ı ʿâlem-i bâlâ ve Vezâret'le çırâğ ve ihyâ eylediğinden gayri Cidde mansıbı ile dahi kadrini iʿlâ eyledi.