Sadrıaʿzam olan Hamza Paşa, yedi mâh kadar eğerçi mesned-ârâ-yı vekâlet-i [M1 229] kübrâ olup lâkin; İzâ tâle ʿömrü'l mer’i min gayr-i âfetin Efâdet lehü'l-eyyâmü fî kerrihâ ʿaklen mefhûmunca imtidâd-ı zemân-ı zindegânî ile kati çok devâhî-yi umûru tecribe eyleyüp, her mâddede te'ennî semtine zâhib ve kesret-i tecârib ile mehleke-i ʿaceleden mücânib olup, bu sıfat-ı garîbe zâtına rehâvet ıtlâkını îcâb ve vakt-i mukadderi dahi iktirâb eylediğinden, rebîʿulâhırın yirmi dördüncü günü ʿazl olunup, kayd-ı musâdereden reh-yâb olarak 'izz u vekārıyla Kandiye mansıbına irsâl ve düyûnuna medâr olmak içün taraf-ı hümâyûndan kifâyet mikdârı nukūd ile mir’ât-ı hâtırından izâle-i gubâr-ı melâl olundu. Haleb Vâlîsi Sadr-ı esbak Mustafa Paşa, bu defʿa dahi mühr-i hümâyûn ile mümtâz ve Âsitâne'ye gelinceye dek Yeniçeri Ağası Mehmed Ağa, Vezâret ve Kāyim-makāmlık ile ser-efrâz olup, Kul Kethudâsı ʿÖmer Ağa, Yeniçeri Ağası nasb ü taʿyîn ve bu cihetle ocağ silsilesi vâkiʿ olmağla, tarîkleri üzere mansıbları tevcîh olunup, hidmetlerinde izhâr-ı istikāmet eylemeleri husûsu cümlesine telkīn olundu.