Şehr-i mezkûrun on ikinci günü Hakān-ı ʿazîmu'ş-şân Sultân Ahmed Câmiʿi'ni hurşîd-i talʿat-ı hümâyûnlarıyla rahşân buyurup, mevlidhânlar velâdetnâme-i Sâhib-i Risâleti âvâz-ı dil-nüvâz ve nagemât-ı cângüdâz ile kırâ'et ve hâzır-ı bi'l-meclis olanlara ifâza-i yümn ü bereket ʿakabinde meşâyih-i ʿizâm vaʿz u tezkîr ile terkīk-i kulûb-i hâss u ʿâmm edüp, meclis hitâmında Şehriyâr-ı kerrûbî-makām debdebe-i Mülûkâne'leriyle Serây-ı dil-ârâlarına ʿatf-ı zimâm buyurdular. Hükümrân-ı memleket-i Kırım olan Kırım Girây Hân'ın vâlidesi hacca niyyet ile bu tarafdan istidʿâ-yı ruhsat etmişidi. Niyâzına müsâʿade ve yol emri verildiğinden başka, yollarda olan vülât ü hükkâma cihet-i emniyyet ve ikrâmı tenbîh ü ifade olunmuşidi. Hacdan ʿavdetinde ʿÂsî-hurma nâm mahalde dâʿî-yi ecele itâʿat ve nahl-i vücûdunu teslîm-i bâğbân-ı rahmet-i Îzed-i bî-minnet eyledi. Ricâl-i Devlet-i ʿaliyye'den Yenişehirli ʿOsmân Efendi, intılâk-ı lisân ile beyne'n-nâs mezkûr ve ʿadem-i müdârâ vü tebasbus ile müteʿârif ve meşhûr olup, gālibâ zahm-ı sinân-ı zebânî ile âzurde olanın biri, hakkında teşvîr-i gazab-ı Şehriyâr-ı kişvergîr edecek bir madde tertîb eylediğinden, târîh-i mezkûrda Limni'ye tagrîb olundu. Başmuhasebe olan Hâşim ʿAli Bey dahi Edirne taʿmîri sûretinde istiskāl ve ol cânibe irsâl olundu. Selh-i rebîʿulâhırda Rumeli-hisârı'ndan Balta-limânı'na gelinceye dek sâhil-hâneler ve bir giceden sonra ʿAzab-kapusu'nda birkaç dükkân sûzân oldu. Târîh-i mezkûrda Piyâde ve süvârî ocağlarının müstehak oldukları mevâcib Hazîne-i ʿâmire'den ihrâc ve teslîm ile kati çok kimse mazhar-ı mevâhib-i Pâdişâh-ı celîlü'l-menâkıb oldu.