Saferü'l-hayrın yirmi üçüncü hamîs gicesi ʿale's-sabâh Üsküdar'da âteş-i serkeş ser-nümâ-yı zuhûr ve beş kol olarak etrâfına şerâre-pâş-ı şerr ü şûr olup, on sekiz sâʿat kabûl-i imtidâd ve yâverî-yi fazl-ı Rabbü'l-ʿibâd lehîb-i nârı karîn-i inhimâd eyledi. Tâ'ife-i sarrâfân ve baʿzı sevdâ-gerân hırs u firâvân iktizâsıyla Dârü'd-darb-ı ʿâmire'de meskûk olan tâmmü'l-ʿayâr altûnun etrâfını katʿ u tenkīs ve baʿzı muʿâmelât-ı fâsideye tahsîs ve muhtâcun ileyh olanlar sarfa ʿarz eylediklerinde, noksân teklîfi ile cihet-i teʿayyüşlerini telh u tengīs eyledikleri maʿlûm olmağla, fî-mâ-baʿd Âsitâne-i saʿâdet'de ve sâyir memâlik-i mahrûsede nâkıs altûna ʿadem-i iʿtibâr ve ashâbı Darb-hâne'ye getürüp, vezni [M1 228] mikdârı akça almak ve yâhûd ol vechile sarrâflara verüp, sarrâflar dahi fi'l-hâl kass ve Darb-hâne'den bedel-i mefrûzunu almak ve bu tenbîhi ısgā etmeyenlere te'dîb-i ʿanîf ile muʿâmele olunmak bâbında her tarafa evâmir-i ʿaliyye ısdâr olundu. Hulûl-i mevsim-i şitâ ile bürûdet-i hevâ derkâr olduğundan, Sâhil-serây-ı Karaağac'dan nakl ü hareket havâlî-gird-i zamîr-i Pâdişâh-ı İskender-menkabet olmağla, işbu şehr-i rebîʿulevvelin onuncu günü mahall-i merkūmdan kemâl-i ikbâl ü şevketle nehzat ve Serây-ı ʿâmire'ye ʿazîmet buyurdular.