Darb-hâne Emîni olan Sıdkı Efendi'nin meʿârif-i cüz'iyyede kemâl-i mehâreti olduğu içün meyl ü rağbet-i Şâhâne'ye mazhar ve yevmen fe-yevmen kesb-i derecât ile ser-i ikbâli nüh-tâk-ı feleke beraber olmuşidi. Giderek Darb-hâne'ye nâzır ve bu cihetle dahi mahsûd-i esâğır ü ekâbir olup, ancak mûmâ ileyh yedinde bulunanı bezl ü isrâf ve meclûbâtını izâʿa vü itlâfdan başka mâl-ı Darb-hâne'ye dahi refte refte itâle-i yed-i taʿarruz u müdâhale eyleyeceği baʿzı karâyin-i hâliye ile hârice çıkup ʿazli lâzum gelmekle, cumâdelûlâ evâhırında ʿazl ve hânesinde ârâm ve Belgrad'da cânib-i ʿAdn'e hırâm eden Vezîr Kürd İbrâhîm Paşa'nın necl-i necîbi olan Râ'if İsmâʿîl Beyefendi'de emâre-i sadâkat ve nişâne-i istikâmet istişmâm olunduğuna binâʾen, o mansıb-ı kesîru'l-cedvâ ile kesb-i şeref-i tâm eyledi.