Anadolu Pâyesi olan ʿAbbas Efendi ve suyolları taʿmîriyle Mekke-i mükerreme'de olan Mîrahûr-i sâbık Mustafa Ağa ve Dimetoka'da merfûʿu'l-Vezâre ikāmet eden Baltacı Vezîr-zâde Silahdâr Mustafa Paşa, hulûl-i ecel-i müsemmâlarıyla intikâl ve hükm-i nâfiz-i irciʿîye imtisâl eylediler. Mütevaffâ ʿAbbas Efendi ki, -Haşmet Efendi merhûmun pederleridir- fünûn-i kesîrede yed-i tûlâsı ve takrîr ü tefhîmde hüsn-i edâsı olup, ʿulûm-i zâhiresinden kati çok kimse kemâlât-ı vâfire iʿtirâf ve gazâret-i ihâtasına muʿâsırı bulunan ʿulemây-ı aʿlâm iʿtirâf etmişler idi. Mukaddemâ Mısır'a me'mûr oldukda, sâde-dilân-ı ümerâyı, emzâ mine'l-husâm olan kelâm-ı bedîʿu'l-insicâm ile ilzâm ve o vuhûş-i deşt-i gavâyeti devlete münkād ü râm eyleyüp, vâfir mâl tahsîl ve ʿirz u nâmûs-i devleti tekmîl eyledi. Vezîr-i müşârun ileyh dahi Enderûn-i hümâyûn'da ʿömr-i ʿazîzini nahv-i ʿilme sarf ve her fenni bir üstâd-ı kâmilden hatf eyleyüp, cevdet-i hattı âsârından maʿlûm-i ashâb-ı [M1 220] istiʿdâd ve hüner ü fazlı sebeb-i gayz ü bugz-i hussâd olup, matlaʿ ve maktaʿ-ı Vezâret'ine dek hedef-i sihâm-ı erbâb-ı gamz ü fesâd olmuşidi. Efâzilü'n-nâsi agrâzun lizâ'z-zimen Yahlû mine'l-hemmi ahlâhüm mine'l-fitan Büyük Tezkireci İbrâhîm Efendi, ser-girân-ı sekret-i mevt olup, sâbıkā Tezkire-i Evvel olan Nu'mân Efendi yerine nasb olundukda, Küçük Tezkireci bulunan İbrâhîm Münîb Efendi, bu tevcîh-i gayr-i vecîhden münfaʿil ve Sadrıaʿzam'a Dîvân Kitâbeti ve Sadâreti'nde Mektûbçuluk etdiğinden tehallüf-i matlabdan âzurde-dil olup, temâruz semtini ihtiyâr ve Bâb-ı âlî'ye gelmemek niyyetini ızmâr eylediğinden, Âmedci Edhem Efendi, Küçük Tezkireci nasb ve Monlacık-zâde ʿAli Ağa dahi Çavuş-başılık ile kapuya celb olundu. Trabzon Vâlîsi Vezîr ʿAbdurrahmân Paşa'ya, Aydın Sancağı ilhâk u zam olunup, selefi Sadrıaʿzam dâmâdı Vezîr Hüseyin Paşa, Eğriboz mansıbına tahrîk-i ʿalem eyledi. Vezîr Kâmil Ahmed Paşa, Kandiye'de hilâf-ı rızâ harekete mütecâsir ve Resmo'da ikāmetine emr-i ʿâlî sâdır oldu. ʿİvaz Paşa-zâde Halîl Bey'e, Duhân Gümrüğü tefvîz ve ilzâm ve Hezârfen Mustafa Ağa'ya, Cebeci-başılık ile ikrâm olundu.