ʿArab-zâde Mehmed Sâdık Efendi, Kazâ-i İzmir ile tevkīr ve Mehmed Nâfiʿ Efendi'nin Üsküdar Kazâsı'yla çeşm-i ibtihâcı tenvîr olunup, Yahyâ-zâde Mehmed Efendi, Mekke-i mükerreme Kazâsı'yla ihyâ ve ʿAli Efendi, icrây-ı ahkâm-ı şerʿiyye zımnında Medîne-i münevvere'ye isrâ ve ʿArab-zâde Ahmed ʿAtâ'ullâh Efendi, Haleb Kazâsı'yla mutayyeb ve Bekir Paşa İmâmı, Kuds-i şerîf Kazâsı'yla nâyil-i matlab oldu. Sadr-ı Anadolu olan ʿİvaz Paşa-zâde İbrâhîm Bey, müddet-i ʿörfiyyesin itmâm ve Seyyid Mustafa Efendi-zâde ʿAbdullah Efendi, Sadâret-i mezkûre ile nâyil-i merâm olup, İstanbul Kadısı Dâmâd-zâde Murâd Monla Efendi dahi tekmîl-i müddet ve ʿAtıf Efendi makāmıyla ihrâz-ı menzilet eyledi.