Serhadd-i mezkûrda Yamaklık iddiʿâsıyla ser-ber-âverde-i bağy ü şekā olan baʿzı erâzil, muhâfızlara galebe ile pû-rûz ve sâyir bidaʿ ihtirâʿından vâfir mâl cemʿ etdiklerinden başka, gümrük ve sâyir menâfiʿ bi'l-külliyye taraflarına vâsıl olup, istedikleri gibi memleketi tasarruf ve vülât-ı ʿizâm idâre-i dâyireleri zımnında ihtiyâr-ı meşâkk u tekellüf etmişler idi. Mîr-i mîrân-ı kirâmdan Vezîr ʿAli Paşa-zâde ʿAbdî Paşa'ya, Muhâfızlık tevcîh ve muktedir olduğu halde nizâm-ı beldeye ihtimâm eylemesi tarafına hufyeten tenbîh olunup, Belgrad'a vusûlünde eşkıyây-ı mezkûre Paşa-yı mûmâ ileyhi istihkār ve âyidâtını edâda mümâtale sûretini izhâr eylediklerinden gayri, tasallutları yevmen fe-yevmen müzdâd ve fukarâ vü zuʿafâya cevr ü eziyyetleri resîde-i derece-i istibʿâd olup, mûmâ ileyh mecbûl olduğu şecâʿati kuvvetden fiʿle îsâl ve hazele-i mezkûrenin müteneffis ve ser-efrâzlarını igtiyâl ü istîsâl ve serhadd-i Pâdişâhî'yi o makūle mütegalliblerden tahlîs ve nizâm-ı beldeyi kemâ yenbagī tarsîs [M1 215] eylediğini Sadrıaʿzam ʿatebe-i gerdûn-mertebe-i Şâhâne'ye ʿarz u telhîs etmekle hidmeti tahsîn ve evâyil-i muharremde câme-i zerbeft-i Vezâret'le kāmet-i istihkākı tezyîn olundu.