Sadr-ı esbak Mustafa Paşa ʿazlinden Mısr-ı Kāhire tevcîh olunan Vezîr Bekir Paşa'nın Mısır'a vusûlünden birkaç gün sonra ʿillet-i insıbâb ile binây-ı ʿömrü harâb ve mütevârî-yi turâb olup, Kapudân-ı deryâ Vezîr Kethudâ Mehmed Paşa, mansıb-ı mezkûr ile resîde-i ser-menzil-i iʿtilâ ve Kapudanlık ile Vezîr Küçük Mustafa Paşa, hâ'iz-i aksa'l-gāye-i buğye vü münâ oldu. Mütevaffâ-yı müşârun ileyh ʿan-asıl Edirne'de mütevellid olup, ʿunfuvân-ı cevânîde Tavukçu-başı dâmâdı Re'îs Mustafa Efendi'ye intısâb ve Duhâncılık hidmetini iktisâb etmişidi. Mustafa Efendi merhûm Sefâret'le Nemçe'ye vardıkda, İmperator Mısır oyununa heveskâr olduğundan, Sefîr-i mûmâ ileyhin âdemlerine atlar ihzâr ve mukābelesinde vâkiʿ fezâ-yı pehnâda ʿarz-ı mişvâr etmişler idi. Bekir Paşa, hadîsü's-sinn ve cirîd-bâzlıkda mübtedî olduğu nümâyân ise dahi teksîr-i sevâd kasdıyla mültehik-ı cirîd-bâzân olmuşidi. Gayret-i akrân ʿinân-rübâ-yı sabr u sâmânı olup, hemân esb-rân-ı meydân ve üftâde-i zemîn olacağını derk ü izʿân edüp, iki ayağı üzerine gelerek bâz-gûne sukûtunu ihfâ vü pinhân eyleyüp, icrây-ı sanʿat etmiş gibi dest-ber endâz-ı temennâ oldukda, Sefîr-i mûmâ ileyh: “Bu dahi Fârisân-ı İslâm miyânında bir nevʿ-i sanʿatdır” deyü İmperator'u igfâl ve sıdka haml ile İmparator'a kemâl-i hayret intikāl etmişidi. Bekir Paşa'nın bu tedârükünden kemâl-i rüşd ü reviyyetini istidlâl ile yevmen fe-yevmen kadrini efzûn ve giderek hazînedâr ve dâmâdlık ile nazar-ı ihtisâsına makrûn edüp, gün be-gün derece-i ikbâli nemâdâr [M1 216] ve hilâl-i iʿtibârı bedr-i tâbdâr olup, menâsıb-ı ʿâliye-i devletde kesb-i şân ve kesret-i îrâd ü nükūd ile müşârun ileyh bi'l-benân olup, bâlâda icmâl olunduğu vech üzere rütbe-i Vezâret'e irtikā ve târîh-i mezkûrda ihtiyâr-ı semt-i ʿukbâ eyledi. Müşârun ileyh mâlik-i nisâb-ı tereffüh ü tenaʿʿum ve ihtişâm ü dârâtda iʿtiyâd-kerde-i tekellüf ü teceşşüm olup, behredâr-ı hüner ve ricâlliği hâlinde nâmver bir zât-ı kerem-güster idi. Nâyil-i câh-ı Vezâret olduklarında her takımı hâzır u müheyyâ bulunduğundan başka, Üsküdar'dan hareketleri günü hazînesinde bin kîselik zer-i meskûk mevcûd olduğunu hazînedârı Küçük İbrâhîm Efendi nakl ü rivâyet etmişdir.