Bundan akdem mesned-i Meşîhat'den [M1 214] ʿazl ve Burusa'da ikāmeti irâde olunan Veliyyüddîn Efendi, sâhil-res-i çâr-mevce-i gurbet ve gelüp, hânesinde bast-ı kālîçe-i istirâhat eyledi. Mağnisa Kadısı Seyyid Mehmed Efendi, mazhar-ı lutf-i Şehriyârî ve bâ-Pâye-i Kudüs Galata Mevleviyyeti ile pâ-nihâde-i dest-i kâm-kârî olup, İkinci Dâhil müderrislerinden Miʿmâr-zâde'ye Belgrad ve Zihnî Mehmed Efendi'ye, Serây-bosna Kazâsı ʿinâyet ve sâbıkā Üsküdar Kadısı ʿÖmer Efendi, hükûmet-i Mısr-ı Kāhire ile neş'edâr-ı câm-ı ferhat kılındı. Mîrahûr-ı Sânî terk-i dünyâ-yı fânî eyleyüp, Küçük Mîrahûrluk ile Uzun Mehmed Bey, mazhar-ı teveccüh-i Cihânbânî oldu. Zilhiccetü'ş-şerîfenin onuncu gicesi erkân-ı saltanat ʿale'l-ʿumûm Serây-ı hümâyûn'a ʿazîmet ve dâmen-bûs-i Şâhâne ile ihrâz-ı mezîd-i rıfʿat eylediler.