Sen ki sâbıkā Basra Vâlîsi vezîrim Süleymân Paşa'sın. Bağdâd Vâlîsi Vezîrim Mehmed Paşa ile aranıza baʿzı gûne nifâk düşüp, bî-vech beyninizde bürûdet hâsıl ve emniyyet zâyil olmakdan nâşî sû'i kurenâ fürce bularak müşârun ileyhi tahdîş ü teşvîşe düşürdüklerine binâ'en, vârid olan tahrîrâtı baʿzı evâmir-i ʿaliyyem ısdârına eğerçi bâʿis ü bâdî olmuşidi. Ancak senden bu âna dek meşhûd olan harekât ü etvâr bi'l-cümle izhâr-ı ʿubûdiyyet ve ibrâz-ı sadâkat sûretlerinde göründüğünden mâʿadâ mücellây-ı ilhâm olan mübârek tabʿ-ı safâ-makrûn-i hümâyûnuma dahi mürâcaʿat eylediğimde, senden sıdk u ihlâsdan gayri bir hâlet rû-nümâ olmadığı cihetden, tarafına ez-derûn-i hüsn-i zann-ı [M1 213] Mülûkâne'm derkâr olmağla, künh ü hakīkatine tahsîl-i ıttılâʿ içün mâdde-i münâkaşa sırran ve ʿalenen tecessüs olunmakda idi. Ahvâline vâkıf ve mizâc ü meşrebine ʿârif olan sikāt-ı sahîhatü'l-kelimât kimesnelerden her bâr ahvâlin istintâk olundukça mâdde-i sıdk u hulûsunu tahkīk ve reviş ü reftârından istidlâl birle her bâr kelâmlarını tasdîk eylediklerinden başka, bundan mukaddemce bir takım tahrîrâtın gelüp, manzûr-i hümâyûnum oldukda, mefhûmları temâm-ı zihn-i sâff-ı Hidîvâne'mde müntakış olup, hulûs-i taviyyet ve sıdk-ı ʿubûdiyyetini te'yîd ü te'kîd etmekle tahrîrâtının mâ-sadakı ve sikātın kelimâtı birbirlerine mutâbık ve cümlesi derûn-i safvet-nümûn-i Şâhâne'me muvâfık düşmekle, hakkında îrâd olunan kīl ü kāl bi'l-cümle dürûg-âmîz ve bî-mâl olduğu yakīnen meczûm-i hümâyûnum olmağla, hilâf-ı inhâ ile hakkında zuhûr eden gazab ü tehevvürât muhavvel-i eltâf ü ʿinâyât ve mûcib-i hüsn-i mükâfât olmağın, mekârim-i bî-pâyân-ı Pâdişâhâne'mden mücerred hüsn-i mükâfât içün Vezâret ve tûg ve sancağın kemâ-kân ibkā ve Bağdâd Eyâleti, müceddeden sana ihsân ü iʿtâ olunduğu ecilden işbu hatt-ı hümâyûn-i mevhibet-makrûnum şeref-yâfte-i sudûr olup, Küçük Mîrahûrum Ağa vesâtatıyle tarafına gönderilmişdir. Selefin Vezîr Mehmed Paşa'ya dahi defʿan li'l-münâkaşa Rumeli Eyâleti tevcîh olunmağla, derhâl anı Bağdâd'dan çıkarup, Rumeli cânibine getürmek ve senin vürûdundan evvel anı ihrâc etmek üzere mübâşir irsâl olunmağın, hatt-ı hümâyûn-i şevket-makrûnum vusûlünde bi'l-cümle kapun halkı ve yanında olan levendâtın ve sevâd-ı cemʿiyyetin ile kalup Bağdâd'a gelüp, kalʿa-i mezbûreyi zabt u muhâfaza ve neferât ve sükkânını himâye ederek cümle ile hüsn-i muʿâşeret ve vârid olan ahkâm-ı münîfemin icrâsına mübâderet ve Devlet-i Îrâniyye ile olan musâlaha şurûtunun devâmına ziyâde iʿtinâ vü nezâret ve hakkında olan hüsn-i zann-ı hümâyûnumu bir kāt dahi te'yîd ü tasdîk ve mazhar-ı duʿây-ı hayr-ı Mülûkâne'm olmağa sarf-ı miknet ve Mîrahûrum mûmâ ileyhi iʿâde eyliyesin intehâ el-hattu's-Sultânî. Bağdâd Eyâleti, münâsebet-i bukʿa vü lisân ile Rakka Vâlîsi Vezîr Saʿdeddîn Paşa'ya tevcîh olunduysa dahi ʿuhdesinde müstekar olmayup, müteveffây-ı müşârun ileyhin memâlîk ve ber-keşîdelerinden kethudâsı ʿAli Ağa'ya Basra ve Bağdâd eyâletleri rütbe-i celîle-i Vezâret'le ihsân olunup, o tarafda muhtemelü'z-zuhûr olan ihtilâl fikri bertaraf oldu.