Müşârun ileyh şöhret-i zâtiyyesi ihâta-i ʿâlem eden Bağdâd Vâlîsi esbak müteveffâ Vezîr Ahmed Paşa'nın memâlikinden olup, dâyiresinde terbiye olunarak Bağdâd muhâsarasında kethudâsı ve medâr-ı kuvvet-i batş ü be'si olmuşidi. Giderek Mîr-i mîrânlık ve Vezâret'le Basra Vâlîsi olup, Ahmed Paşa vefâtında Basra'da bulunduğundan dâyiresi tarafına iltihâk ve biribirleriyle ʿahd ü mîsâk eyleyüp, Rûm vüzerâsı tarafından her ne kadar rûy-i mülâyemet irâʾetiyle iftirâs olunmak murâd olunduysa şebeke-i ihtiyâlden firâr ve ʿâkıbet: “Zabt-ı Bağdâd mûmâ ileyhin zevâl-i vücuduna muhtacdır” deyü Tiryâkî Vezîr, katline fermân isdâr ve üzerine taʿyîn-i asker-i cerrâr etmişidi. İʿmâl-i Bağdâd'dan Haseke nâm mahalde tekābül-i saffeyn vâkiʿ olmazdan mukaddem Süleymân Paşa, iʿmâl-i letâyifü'l-hiyel ve o taraf askerinin ekserîsini tarafına celb ile kusûrunu bir hamlede perîşân-kerde-i sinân-ı cedel eyleyüp, bi'z-zarûre Bağdâd ve Basra tarafına ihsân ve havf-ı cân ile ihtiyâr eylediği şîve-i ʿisyân nühüfte-i perde-i kitmân kılınup, giderek o serhadd-i mansûrayı vâreste-i ihtilâl ü fesâd ve rızây-ı devleti semîr-i fu'âd eyleyerek ʿaşâyir-i Ekrâd u ʿUrbân'ı pâ-beste-i ʿikāl-i tûg u inkıyâd eyleyüp, on iki sene kadar kutr-i Bağdâd bâğ-ı dâd ve şûr u fitneden âzâd olup, vaktinde ehâlî-yi belde ve hâric-i sûr zevâl-i şûr ile dâru's-sürûr-i sûr oldu. Müşârun ileyhde olan necdet ü şecâʿat ve kemâl-i sehâvet o diyârda hâlâ dâstân-ı lisân-ı ebnây-ı zemân olup, sinnî-yi ʿömrü altmış altı ʿakdine resîde oldukda, terk-i ʿâlem-i fânî ve ihtiyâr-ı semt-i câvidânî eyledi. ʿUrbân miyânında mızrak sâhibi demekden kinâye olarak Ebû Semüre ve gāret-i leyliyyesinden ibâret olarak devvâsü'l-leyl şöhretiyle nâmdâr olmuşidi. İbkā-yı Vezâret'ine dâ'ir hatt-ı hümâyûn me'âli bu mahalle kayd olundu.