Sâbıkā Kapu Ağası Halîl Ağa, ʿömr-i girân-mâyeden hadd-i sad-sâleyi ihrâz ve bu esnâda tâyir-i rûhu âşiyân-ı kadîmine pervâz eyleyüp, ʿuhdesinde olan Yafa Tevliyyeti ile hâlâ Kapu Ağası olan Kāsım-paşalı Mehmed Ağa, kesb-i ibtihâc ü ihtizâz eyledi. Üdebây-ı zemâneden Haşmet Efendi ve Nevres ʿAbdurrezzâk Efendi, intılâk-ı lisân ve cerh-i kulûb-i ihvân ile mübtelây-ı gurbet-i mûrisü'l-eşcân oldular. Bî-çâre Nevres Kütahya'da birkaç gün ikâmetden sonra ecel-i nâgeh-res ile münkatiʿu'n-nefes oldu. ʿAn-asl Kerkük sükkânından olup, zâtı pîrâye-i ʿilm ü edeb ile ârâste ve gül-i sad-berg liyâkati gülşen-i meʿârifden nevhâste iken, gamz-ı hussâda binâ-i belâ-yı celâ ile dil-şikeste olup, çok geçmeden hücûm-i âlâm-ı ahzân ile mukīm-i kûşe-i hâmûşân oldu. Mevâlî-yi Devriye'den maʿdûd ve sitem-i zemâneye gayr-i mütehammil bir zât-ı nâdiru'l-vücûd idi. Vâdî-yi şiʿirde tavrı kendüye mahsûs olup, müretteb dîvânı beyne'n-nâs mütedâvel ve makbûl-i erbâb-ı kasîde vü gazeldir. Zilkaʿde evâyilinde Kapudân-ı deryâ Vezîr Kethudâ Mehmed Paşa, Donanma-yı hümâyûn ile Ak-deniz'e şirâʿ-güşâ oldu. Şehr-i mezkûrun yirmi sekizinci gicesi sâʿat ikide iken Sultân Bâyezîd kurbunda Destereciler ittisâlinde vâkiʿ bir pîre-zenin hânesinden âteş zuhûr edüp, Dîvân-yolu'nda olan dekâkîni ve Tavşan-taşı semtinde olan kebîr u sagīr hâneleri ihrâk etdikden sonra Nişancı ve Langa Yeni-kapusu'na sirâyet ile Sadrıaʿzam hânesinde nihâyet bulup, rûzgâr gāyet müştedd olduğundan otuz sâʿat kadar ihrâk mümted olup, fazl-ı Hak ile muntafî ve kulûb-i nâsdan kalak u iztırâb müntefî oldu. Sadrıaʿzam bu mûsîbetde halk ile hemdem bulunduğundan îfây-ı şükr-i Bârî'ü'n-nesem kılup, taraf-ı hümâyûndan esb-i müzeyyen ve ferve-i semmûr ile taltîf kılındığından başka sâyir harîk-zedeler dahi eltâf-ı Pâdişâhî'den hisse-mend-i nevâle-i niʿam ve bâ-husûs Yeniçeri Ağası ihtirâk-ı yedeyn ve Bostâncı-başı inkisâr-ı ricleyn ile pür-elem olduklarından, ferve-i semmûr ve kerem-i mevfûr ile ikisinin dahi hâtırları mecbûr ve sâyir zâbitân ve neferât ʿatâyâ ve terakkıyât ile mesrûr kılındı.