Şevvâlin beşinci hamîs günü tevcîhât vâkiʿ olup, ricâl-i bâb cümlesi ibkā olunup, fekat Çavuş-başılık, ʿİvaz Paşa-zâde Halîl Bey ʿazlinden Mîrahûr-i Sânî ʿAbdullatîf Bey'e tevcîh olundu. Defterdârân kezâlik ibkā olunup, Defter-i Hâkānî Emâneti, Subhî Efendi'ye; Rûznâme, Koca Bekir Bey'e; Baş-muhasebe, Subhî-zâde ʿAbdullah Efendi'ye tevcîh olundu. Menâsıb-ı ümenâ mutasarrıflarına ibkā olunup, Anadolu Muhasebesi, Resmî el-Hâc Ahmed Efendi'ye; Süvârî, ʿİzzet Paşa Mühürdârı Dervîş Efendi'ye; Haremeyn Muhâsebeciliği, Elmâs Paşa-zâde'ye; Yeniçeri Kitâbeti, Hâşim Efendi'ye; Sipâh Kitâbeti, ʿAtıfzâde ʿÖmer Efendi'ye; Silahdâr Kitâbeti, Şehr-emînî-yi sâbık ʿAli Efendi'ye; Cizye Muhâsebesi, Hazîne Kethudâsı Seyyid Mehmed Efendi'ye; Mevkūfât, Sultân Kethudâsı ʿOsmân Efendi'ye; Mâliyye, Nurullâh Bey'e; Küçük Rûznâme, ʿAbdurrezzâk Efendi'ye tevcîh ve sâyir menâsıb ile sâyir hâcegânın hâli terfîh olunup, münâvebeden hâric kalan baʿzı hâcegân ʿatâyây-ı Pâdişâhî ile mesrûr u şâdân oldu. Rikâb ağalığları dahi mutasarrıflarına cümleten ibkā olunup, fekat Küçük Mîrahûrluk, Hamevî-zâde dâmâdı Selîm Ağa'ya ve Sipâh ve Silahdâr ağalıkları Mehmed Emîn Ağazâdelere tevcîh ve Başbâkī-kulluğu, Abdâl Mehmed Ağa'ya ve Piyâde ocağlarının ağaları yine ibkā vü takrîr olundu. Yevm-i mezkûrda vüzerây-ı ʿizâm tevcîhâtı dahi vâkiʿ olup, Anadolu Eyâleti, Özi Eyâleti tevcîh olunan Silahdâr Hamza Paşa ʿazlinden müceddeden Vezâret'le kadri terfîʿ olunan Kapu-kıran Mehmed Paşa'ya; Hotin Sancağı, Kapudân-ı esbak Vezîr Mehmed Paşa'ya; Belgrad Muhâfızlığı, Vâlîsi olan Mîrahûr Mustafa Paşa mahlûlunden Mîr-i mîrân ʿAbdî Paşa'ya; Eğriboz Sancağı, Kapudân-ı esbak [M1 211] Vezîr Mustafa Paşa'ya; Marʿaş Eyâleti, Mekkî-zâde Vezîr Hüseyin Paşa'ya; Eyâlet-i Sivas, Silahdâr Mehmed Paşa'ya; Selânik ve Burusa sancağları, Vezîr Küçük Mustafa Paşa'ya; Mora Eyâleti, Defterdâr Vezîr Ahmed Paşa'ya tevcîh ve sâyirleri ibkā olundu.