İstanköy pîşgâhında iken gaflet-i zâbitân ile üserânın Malta'ya alup, götürdükleri sefînenin lutfen ve ʿunfen istirdâdiyle nâmûs-i devleti tekmîl matlûb-i Pâdişâh-ı İskender ü ʿadîl olduğuna binâʿen, Malta'da ʿalâka-i külliyesi olan Françelü'ye bu mâdde tahmîl ve sûret bulmadığı hâlde muʿâmele-i âharı ihtiyâr olunacağı icmâl ü tafsîl olunmuşidi. Zikr olunan sefîneyi cemîʿ-i edâvâtıyla Françelü tahlîs edüp, âl çukadan pûşîdeler ile tezyîn ve ehl-i İslâm'dan vâfir üserâ dahi derûnuna teşhîn edüp, cumâdelâhire evâsıtında vâsıl-ı furza-i Âsitâne-i saʿâdet olmağla, Françe elçisinin sebkat eden hidmetine mücâzât lâzım gelüp, Bâb-ı ʿâlî'ye ihzâr ve bir sevb-i semmûr kürk ve bir donanmış esb ile memnûn-i lutf-i Devlet-i ebed-karâr kılındığından başka, bi'l-maʿiyye vürûd eden sefîne kapudanı dahi ferve-i kākum ilbâsıyla iktisâb-ı vekār eyledi.