Tafsîl-i ahvâli bâlâda tahrîr olunan ʿAbdurrahmân Paşa, merfûʿu'l-Vezâre Dârende'de [M1 204] ârâm ve devâm-ı ʿömr-i Pâdişâhî'yi nukāve-i merâm etmişidi. Müşârun ileyhin Cerde hidmetinde müşâhede olunan gayret ü hamiyyeti ve beyne'l-vüzerâ rüşd ü reviyyetle kemâl-i şöhreti olup, vaktiyle Devlet-i ʿaliyyenin bir selmesine sedd ve sihâm-ı nâyibe-i mülkiyyenin baʿzısına hedef-i red olacağı mütehakkak olmağla, Vezâret'i ibkā ve Trabzon Eyâleti'yle çeşm-i ibtihâcı rûşenâ kılındı. İstanbul Kadısı Sâlih-zâde müddetini tekmîl ile münʿazil ve Damâd-zâde Murâd Monla Efendi yerine muttasıl olup, İshak-zâde Şerîf Monla Efendi dahi kazâ-i Mekke-i mükerreme ile dilşâd ve Süleymân Efendi-zâde ʿAbdullah Efendi, Medîne-i münevvere ile ber-murâd oldu. Bundan akdem Ak-deniz'e doğru şirâʿ-güşâ olan Donanma-yı hümâyûn mashûben bi's-selâme ʿavdet ile mersây-ı Tersâne'ye lenger-endâz-ı heybet oldu.