Vâlî-yi Maraş, Sadr-ı esbak Mehmed Paşa'nın maraz-ı gûnâ-gûn ile hâli müşevveş olduğuna binâ'en, işbu rebîʿulevvelde zâyik-ı zehrâbe-i memât ve kasr-ı ʿömrü harâb-gerde-i seyl-i hâdimü'l-lezzât oldu. Müşârun ileyh kibâr-ı hâcegân-ı Dîvân-ı hümâyûn'dan Yirmisekiz Çelebî dimekle meşhûr Mehmed Efendi'nin sulbünden zuhûr edüp, terbiye-i hizâne-i peder ile fârik-ı miyân-ı hazf ü güher oldukda, Mektûbî Kalemi'ne me'mûr ve o hilâlde pederleri Françe Sefîri nasb olunmağla, bi'r-refâka ʿâzim-i savb-ı mezkûr olmuşidi. ʿAvdetden sonra bi't-tedrîc katʿ-ı merâtib ve deverân-ı menâsıb eyleyüp, Sipâh ve Silâhdâr kitâbetleri râddesinde iken, katʿ-ı hudûda me'mûr ve eyâdî- yi ehâlî-yi Bosna'dan firârı meşhûr olup, elli iki târîhinde Nehr-i Sâve adalarına muhadded ve elli dörtde Françe Sefâretiyle kevkeb-i bahtı mütevakkıd olmuşidi. İtmâm-ı hıdmet-i Sefâret'le elli beşde Âsitâne'ye ʿavdet ve mansıb-ı Tevkīʿî ile ihrâz-ı menzilet eyledi. Elli yedi muharreminde cânib-i Mısır'a taʿyîn ve elli sekiz şevvâlinde kemâ fi'l-evvel Nişancılık ile kâmbîn kılınup, baʿdehû Emîn-i Defter-i Hâkānî ve nâyil-i bulga-i kâmrânî olup, elli dokuz recebinde Sadâret-i ʿuzmâ Kethudâlığı'yla tebcîl ve ʿadem-i imtizâc ile bi't-taleb Defter Emâneti'ne tenzîl olunmuşidi. Altmış üçde mükerreren Kethudâ ve baʿdehû ʿazle mübtelâ ve Baş-muhasebe iken, tekrâr Kethudây-ı Sadr-ı meʿâlî-pîrâ oldu. Muharremü'l-harâmın on dokuzuncu günü Sadrıaʿzam olup, beş buçuk aydan sonra ʿazl ve Hanya mansıbına nakl ve yetmiş şaʿbânında Tevliyyet-i Mısır'a vasl olunmuşidi. Yetmiş iki muharreminde Adana ve sâ'ir mansıbları devr ederek yetmiş rebîʿinde fevti haberi vâsıl-ı semʿ-i devlet oldu. Müşârun ileyh meʿârif-i cüz'iyyeye vâkıf u dânâ ve küttâba lâzım olacak kadar edeb ü hüner ile [M1 205] şöhret-nümâ olan müfredât-ı Tıb'da Türkî ʿibâre ile yazdığı nüsha, makbûl-i etıbbây-ı zemâne ve ʿulûvv-i himmet ile yegâne bir Vezîr-i Felâtûn-nişâne idi.