Şevvâlin on ikinci günü ʿâdet-i dîrîn-i saltanat-ı ʿaliyye üzere tevcîhât vâkiʿ olup, ricâl-i bâb ve defterdârân ibkā şerefini iktisâb ve Defter Emâneti ile Nuʿmân Efendi ve Büyük Rûznâme ile Yûsuf Efendi, kemâl-i inbisât u meserret isticlâb eylediler. Başmuhâsebe, ʿAvnî Efendi'ye ve Şehremâneti, Hâşim ʿAlî Bey'e tevcîh ve Tersâne ve Darb-hâne ve Matbah ve Arpa emânetleri, mutasarrıflarına ibkā olundu. Anadolu Muhâsebesi, Muhsin-zâde birâderi Ahmed Efendi'ye ve Atlu Mukābeleciliği, Behcet birâderi Sârim İbrâhîm Efendi'ye tevcîh ve Haremeyn Muhâsebeciliği, mutasarrıf-ı sâbıkına ibkā olunup, Yeniçeri Kitâbeti, Re'îs-i sâbık ʿAbdullah Efendi'ye, Sipâh Kitâbeti, Hâkim Efendi'ye; Silahdâr Kitâbeti, İbrâhîm Paşa-zâde Râyif İsmâʿîl Bey'e; Cizye Muhâsebesi, Bekir Paşa-zâde Süleymân Bey'e; Mevkūfât, Yâzıcı-yı esbak Halîl Efendi'ye; Mâliyye, Merâkī Hüseyin Efendi'ye ve sâyir menâsıb-ı Devlet-i ebed-müddet dahi erbâb-ı istihkāka tevcîh olunup, mansıbdan mahrûm olanlara ʿatâyây-ı Şâhâne bezl ve cümlesi vâreste-i muzâyaka vü ezel oldu. Ve Yeniçeri Ağalığı, Kul Kethudâsı Mahmûd Ağa'ya müceddeden tevcîh ve sabıkı Tekfur-dağı'na tebʿîd ü tenzîh olunup, Sipâh Ağalığı, ʿAbdullah Paşa Kethudâsı Ahmed Ağa'ya; Silahdâr Ağalığı, Kadri Ağa-zâde Mehmed Ağa'ya kezâlik tevcîh olunup, Baş-bakī Kulluğu ve Cebeci ve Topcu ve 'Arabacı-başılıklar ibkā olundu. Vüzerây-ı ʿizâm tevcîhâtı dahi yevm-i mezbûrda vâkiʿ olup, Rumeli Eyâleti, Vezîr Hamza Paşa'ya; Selânik Sancağı, Vezîr Mehmed Paşa'ya; Bosna, Hersek Sancağı ilhâkıyla Muhsin-zâde Vezîr Mehmed Paşa'ya tevcîh olunup, sâyir eyâlât ü elviye dahi mutasarrıfları olan vüzerây-ı ʿizâm ve mîr-i mîrân-ı kirâma ibkā olundu.