Duhân Gümrüğü Emâneti bundan akdem Sultân Kethudâsı ʿAli Ağa'ya ilzâm olunmuşidi. Bir sene kadar mukātaʿa-i mezkûreyi idâre ile mâl-ı mukayyedini cânib-i mîrîye teslîm ve ʿâm-ı kābil iltizâmını tanzîm etmişidi. [M1 198] Mühtedî Mehmed Ağa, bir mikdâr mâl zammıyla iltizâmına tâlib olduğu ʿAli Ağa'ya inhâ olundukda, o mikdâr mâl ile kabûlden imtinâʿ u ibâ etmekle, tâlib-i mezkûre kāʿide-i mîrî üzere ilzâm olunup, bu sebeble mîrîye nefʿ u cedvâ ve fâyide vü nemâ rû-nümâ oldu. Afgān tâ'ifesinden olup, Nâdir Şâh'dan sonra tedrîcî kesb-i tâb ü kuvvet ve muʿârızı olan Zend Kerîm ve sâyir hânân-ı İrân ile mukāvemet edüp, ekser-i hâlde gālib ve Isfehan'ı zabt ile o ülke ehâlîsi semtine câlib olmuşiken, kevkeb-i bahtı tîre ve çeşm-i iktidârı hîre olup, aʿdâsı her tarafdan üzerine hücûm ve askeri mehzûm ve kaçarak bir defʿa Kars'a ve baʿdehû Bağdâd'a gelüp, Devlet-i ʿaliyye'ye ilticâ ve iʿânet ü muzâharet recâ etmişidi. Devlet-i İrâniyân herc ü merc üzere olup, müstakil şâhları olmadığından, iʿânetde be's olmadığını müdebbirân-ı devlet ilkā ve Bağdâd tarafından matlûbuna müsâʿade olunmak Bağdâd Vâlîsi Vezîr Süleymân Paşa'ya tahrîr ü inhâ olunup, Kürdistân ehâlîsinden ve nefs-i Bağdâd'dan ve ʿUrbân tâyifesinden maʿiyyetine vâfir âdem koşulup, mühimmât ve top ile Rûmiyye taraflarına teveccüh edüp, Zend Kerîm askeriy-le tekābül ve işʿâl-i nâyire-i tecâdül ve bu defʿa dahi münhezim ve maʿiyyetinde olan askerin ekserîsi münʿadim olup, el-yevm Tiflis taraflarında karâr eylediği taraf-ı devlete ihbâr olundu. Prusya Kralı, Nemçe ve Moskovlu ile bir müddetden berü münâveşe ve ahadühümâ âhar ile muhâreşe edüp, iki devlet müdâfasından ʿâciz ve muztar ve iktisâb-ı teʿayyun ile nâmver olduğundan, düvel-i sâyire gibi Devlet-i ʿaliyye ile kesb-i münâsebet ve tanzîm-i umûr-i ticâret sadedinde olup, birkaç defʿa Der-bâr-ı ʿatûfet-medâra niyâz-nâme irsâl ve husûl-i matlabı zımnında refʿ-i eküff-i ibtihâl etmekle recâsı hayyiz-i husûle karîn olup, dîvân kaleminde mukayyed olduğu vech üzere maslahat-ı ticârete sûret-i temşiyet ve sâyir devletler gibi tüccârının âmed-şuduna ruhsat verildi. Rumeli Sadâreti'ne revnak veren Mirzâ-zâde, müddet-i ʿörfiyyesin itmâm ile dağdağa-i hükûmetden âzâde olup, Ebûbekir Efendi-zâde ʿOsmân Efendi, Rumeli sadrına takrîb ve huzûr-i Sadrıaʿzamî'de ilbâs-ı ferve-i semmûr ile tatrîb olundu.